وڭتۇستىكتەگى 45-50 گرادۋس ىستىقتا ءبىر تامشى سۋ ىشپەگەن قاۋىندار ءدامدى ءارى ۇلكەن بولىپ وسكەن. شارۋالاردىڭ سوزىنشە، اۋىل شارۋاشىلىعىنداعى بۇل ءتاسىلدى اتا-بابالارىمىز بۇرىن دا قولدانعان.
– جىلدان-جىلعا اعىن سۋ ماسەلەسى كۇردەلەنىپ كەلەدى. سوندىقتان بۇرىنعى اتا-بابالارىمىزدىڭ ۇيرەتكەن تاجىريبەسىن جاساپ كورۋگە بەل بۋدىم. كوكتەمنىڭ العاشقى ايلارىندا سۋارمالى سۋ ەشكىمگە كەرەك ەمەس كەزدەر بولادى. سول اقپان ايىنىڭ باسىندا ەگىستىك القابىمدى ابدەن سۋارىپ، سۋ ءسىڭدىرىپ الدىم. سودان قاۋىن ەكتىم. شىلدە ايىنداعى 45-50 گرادۋس ىستىقتا دا سۋ بەرگەن جوقپىن. 120 كۇن سۋ ىشپەدى. ناتيجەسىندە قاۋىندارىم جاقسى ءونىم بەردى. ءدامدى بولدى، – دەيدى شارۋا ازيزحان ەگەمبەردييەۆ.
شارۋا قارناق اۋىلىندا تۇرادى. ونىڭ اۋىل ماڭىنداعى جەر ۋچاسكەسىندە ەگىستىككە ارنالعان جەرى بار. بيىل سونىڭ 4 گەكتارىنا قاۋىن، 1 گەكتارىنا قاربىز ەككەن. ءناپاقاسىن جەر-انادان ىزدەگەن شارۋا جيناعان ءونىمىن جەرگىلىكتى جەردە ساۋداعا شىعارعان. ءدامدى قاۋىندى تۇتىنۋشىلار دا كوپ بولىپتى.
ونىڭ ايتۋىنشا، بۇل ءتاسىلدى كەز كەلگەن قاۋىننىڭ سورتىنا پايدالانا بەرۋگە بولادى. تەك جەر تىڭ بولۋى قاجەت. ەندى شارۋا الداعى جىلدارى ەگىستىك القابىن ۇلعايتۋدى جوسپارلاپ وتىر. قاۋىننان مول ءونىم الىپ جاتسا، شەت ەلگە الىپ بارىپ ساتۋ دا ويىندا بار.
