تۇركىستان وبلىسىنىڭ اكىمدىگى تۇلەكتەردىڭ جوعارى بىلىمگە قول جەتكىزۋىنە قولداۋ ءبىلدىرىپ كەلەدى. وبلىس اكىمدىگىنىڭ بيۋدجەتى ەسەبىنەن جوعارى جانە جوعارى وقۋ ورنىنان كەيىنگى ءبىلىمى بار كادرلاردى دايارلاۋعا مەملەكەتتىك ءبىلىم بەرۋ تاپسىرىسىن» ورنالاستىرۋ ماقساتىندا «Woosong» ۋنيۆەرسيتەتىنە وقۋعا ءتۇسۋ ءۇشىن 100 بالاعا ارنايى گرانت ءبولىندى،- دەپ حابارلايدى Dalanews.kz
«Woosong» ءبىلىم قورىنىڭ رەسمي سايتى ارقىلى جالپى 400-دەن استام ابيتۋريەنت قۇجات تاپسىردى. وڭىرىمىزدەن بولەك، وزبەكستان رەسپۋبليكاسىنان جانە ەلىمىزدىڭ بارلىق وبلىستارىنان قۇجاتتار ەنگىزىلدى. اتالعان قۇجاتتاردى ىرىكتەۋ جانە سۇحباتتاسۋ تىكەلەي كورەي وكىلدىگى تاراپىنان جۇرگىزىلدى.
وسى ماقساتتا وبلىس اكىمىنىڭ ورىنباسارى بەيسەنباي داۋلەت ۇلىنىڭ قاتىسۋىمەن ارنايى كوميسسيا قۇرىلدى. جاۋاپتى سالالاردىڭ باسقارما باسشىلارىنان قۇرىلعان كوميسسياعا 242 تۇلەكتىڭ قۇجاتتارى ۇسىنىلدى.
– تۇركىستان وبلىسىنىڭ اكىمدىگى مەن كورەي رەسپۋبليكاسىنىڭ «Woosong» ءبىلىم قورى اراسىندا تۇركىستان قالاسىندا «Woosong» ۋنيۆەرسيتەتىنىڭ اقپاراتتىق تەحنولوگيالار سالاسىندا «ۆۋسونگ ۋنيۆەرسيتەتى قازاقستان» جوعارى وقۋ ورنىن قۇرۋ تۋرالى كەلىسىم جاسالىپ، 2024 جىلدىڭ 1 ساۋىرىندە ىنتىماقتاستىق تۋرالى مەموراندۋمعا قول قويىلدى. بۇگىندە «ۆۋسونگ ۋنيۆەرسيتەتى قازاقستان» ج ش س رەتىندە تىركەلىپ، تامىز ايىندا جوعارى وقۋ ورنى رەتىندە ليسەنزيا يەلەندى. ءبىلىم قورى تاراپىنان اتالعان جوعارى وقۋ ورنىنا 14 پروفەسسورلىق قۇرام جاساقتالدى. بولاشاقتا «Woosong-Turkistan» ۋنيۆەرسيتەتىنىڭ 3 نەمەسە 4 كۋرس ستۋدەنتتەرى بىلىكتىلىك تالاپتارىنا سايكەس حالىقارالىق تاجىريبە الا الادى. بۇل باعدارلامادا ستۋدەنتتەرگە كورەي ەلىندەگى «Woosong» ۋنيۆەرسيتەتىندە نەمەسە ونىڭ سەرىكتەس ۋنيۆەرسيتەتتەرىندە ءبىر نەمەسە ەكى سەمەستر وقۋعا مۇمكىندىك بەرىلەدى، – دەدى بەيسەنباي تاجىبايەۆ.
ايتا كەتەيىك، «Woosong» ۋنيۆەرسيتەتىندە ەكى جىل وقىعاننان كەيىن ستۋدەنتتەر قوس ديپلوم باعدارلاماسىنا قاتىسۋعا مۇمكىندىك الادى. بۇل باعدارلامادا تالاپكەرلەرگە كورەي ەلىندەگى «Woosong» ۋنيۆەرسيتەتىندە نەمەسە ونىڭ سەرىكتەس ۋنيۆەرسيتەتتەرىندە ءبىلىم الىپ، جانە وقۋىن اياقتاعان سوڭ ەكى ەلدىڭ ديپلومىن الا الادى.
