الماتىدا ءىرى ەسىرتكى زەرتحاناسىنىڭ ۇيىمداستىرۋشىسى سوتتالدى،- دەپ حابارلايدى Dalanews.kz

الماتىدا وتكەن جىلدىڭ قازان ايىندا جەراستى ەسىرتكى زەرتحاناسىن ۇيىمداستىرعانى ءۇشىن ۇستالعان الماتى وبلىسىنىڭ 35 جاستاعى تۇرعىنى 8 جىلعا باس بوستاندىعىنان ايىرىلدى.

زەرتحانا مەدەۋ اۋدانىنىڭ جەكە سەكتورىندا ورنالاسقان. قالا پروكۋراتۋراسىنىڭ ۇيلەستىرۋىمەن جۇرگىزىلگەن ارنايى ءىس-شارا بارىسىندا پوليسيا قىزمەتكەرلەرى 21 كەلىدەن استام دايىن مەفەدرون، حيميالىق رەاگەنتتەر، ەسىرتكى ءوندىرىسى مەن بۋىپ-تۇيۋگە ارنالعان قۇرال-جابدىقتاردى تاپتى جانە تاركىلەدى.

- بۇل ازاماتقا قاتىستى سوتتىڭ ۇكىمى اتقارىلعان جۇمىستاردىڭ زاڭدى ناتيجەسى بولىپ سانالادى. ەسىرتكى زەرتحاناسىنىڭ ۇيىمداستىرۋشىسى كىنالى دەپ تانىلدى، ءتيىستى جازاسىن الادى. مۇنداي قىلمىستار قوعام ءۇشىن ۇلكەن ءقاۋىپ توندىرەدى، سوندىقتان الماتى پوليسياسى ەسىرتكى قىلمىسىنا قارسى كۇرەستى جۇيەلى تۇردە جالعاستىرىپ كەلەدى. ءبىزدىڭ ماقساتىمىز – جەتكىزۋ ارنالارىنىڭ جولىن كەسۋ، سينتەتيكالىق ەسىرتكىلەردىڭ تارالۋىنا جول بەرمەۋ جانە جاستاردى ەسىرتكى قاۋىپىنەن قورعاۋ، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى مۇرات جۇمابايەۆ.

پوليسيا ەسىرتكى جاساۋ جانە تاراتقانى ءۇشىن قاتاڭ قىلمىستىق جاۋاپكەرشىلىك قاراستىرىلعانىن ەسكە سالادى.