Almatyda iri esirtki zerthanasynyń uıymdastyrýshysy sottaldy,- dep habarlaıdy Dalanews.kz

Almatyda ótken jyldyń qazan aıynda jerasty esirtki zerthanasyn uıymdastyrǵany úshin ustalǵan Almaty oblysynyń 35 jastaǵy turǵyny 8 jylǵa bas bostandyǵynan aıyryldy.

Zerthana Medeý aýdanynyń jeke sektorynda ornalasqan. Qala prokýratýrasynyń úılestirýimen júrgizilgen arnaıy is-shara barysynda polısıa qyzmetkerleri 21 keliden astam daıyn mefedron, hımıalyq reagentter, esirtki óndirisi men býyp-túıýge arnalǵan qural-jabdyqtardy tapty jáne tárkiledi.

- Bul azamatqa qatysty sottyń úkimi atqarylǵan jumystardyń zańdy nátıjesi bolyp sanalady. Esirtki zerthanasynyń uıymdastyrýshysy kináli dep tanyldy, tıisti jazasyn alady. Mundaı qylmystar qoǵam úshin úlken qaýip tóndiredi, sondyqtan Almaty polısıasy esirtki qylmysyna qarsy kúresti júıeli túrde jalǵastyryp keledi. Bizdiń maqsatymyz – jetkizý arnalarynyń jolyn kesý, sıntetıkalyq esirtkilerdiń taralýyna jol bermeý jáne jastardy esirtki qaýipinen qorǵaý, – dedi Almaty qalalyq PD esirtki qylmysyna qarsy kúres basqarmasynyń bastyǵy Murat Jumabaev.

Polısıa esirtki jasaý jáne taratqany úshin qatań qylmystyq jaýapkershilik qarastyrylǵanyn eske salady.