Belgili saiasatker Zamanbek Nurqadilovtiń nemeresi Nurbibi áleýmettik jelidegi paraqshasynda atasy qaitys bolǵannan keiin olardyń otbasy qandai jaǵdaiǵa tap bolǵanyn jazdy, dep habarlaidy dalanews.kz.
Onyń aitýynsha, ákesi Qairat Nurqadilov qazir 59 jasynda jumys taba almai júr. Nurbibi buryn otbasynyń janynda júrgen, aralas-quralas bolǵan adamdardyń búginde syrt ainalǵanyn aitty.
“Atam tiri kezinde jáne joǵary laýazymda bolǵan shaqta ákemniń telefony bir sátke de tynym tappaityn. Barlyǵy onymen jaqyn bolýǵa tyrysatyn. Árkimniń óz qajeti bar edi. Ainalasyn jaǵympazdar men jaramsaqtar qorshap júretin. Al qazir sol adamdardyń eshqaisysy ákemniń habarlamalaryna jaýap bermeidi, tipti odan eshqashan kómek kórmegendei keiip tanytady”, – dep jazdy Nurbibi Nurqadilova.
Ol ákesimen ár sóilesken saiyn júregi aýyratynyn, onyń qazirgi jaǵdaiyn kórý ózine aýyr tietinin jetkizdi.
“Ol 59 jasynda jumys izdep, tabanyn tozdyryp júgirip júr. Bir kezde ózine erekshe qurmet kórsetken adamdardyń bárinen jumysqa ornalasýǵa járdem suraidy. Biraq olardyń jaýaby – bas tartý, únsizdik jáne mensinbeýshilik”, – dedi ol.
Nurbibiniń sózinshe, atasy tiri kezde Qairat Nurqadilov kópshilikke kerek adam bolǵan. Al qazir ol ózin ómirdiń shetine yǵystyrylǵandai sezinedi deidi.
“Búgin taǵy da ákemmen kezdestim. Áńgimemiz taǵy da atamnyń is-áreketteri onyń ómirine jáne bizdiń taǵdyrymyzǵa qalai áser etkeni týraly boldy. Taǵy da onyń janarynan túńilý men aqtalmaǵan úmittiń izin kórdim. Taǵy da osy jaǵdaiǵa qatysy bar adamdardyń bárine degen ókpe-renish boiymdy biledi. Áli kúnge deiin ádildik ornaǵan joq. Áli kúnge deiin bul áýlettiń tegi bizdiń iyǵymyzǵa aýyr júk bolyp túsip tur. Ókinishti-aq”, – dep jazdy Nurbibi.
Aita keteiik, Qairat Nurqadilov ár jyldary memlekettik jáne jekemenshik uiymdarda basshylyq qyzmetter atqarǵan.
Zamanbek Nurqadilov 2005 jylǵy 12 qarashada óz úiinen óli tabylǵan edi.
Belgili saiasatker eki ret shańyraq kótergen. Alǵashqy jubaiy Nurbike Nurqadilovadan Qairat esimdi uly jáne Quralai esimdi qyzy dúniege kelgen. Quralai Nurqadilova keiin tanymal dizainer atanyp, “Quralai” sán úiiniń negizin qalady. Qairat Nurqadilovtiń Nurbibi esimdi qyzy bar.
Keiin Zamanbek Nurqadilov Qazaqstannyń halyq ártisi Maqpal Júnisovamen otbasyn qurdy. Bul nekeden Merei Zamanbek esimdi qyzdary dúniege kelgen.
