الماتىدا 40 قاباتتى Rams Beyond عيماراتىنىڭ قۇرىلىسى توقتاتىلدى, دەپ حابارلايدى Dalanews.kz.
الماتىدا قوعامدا قىزۋ تالقىعا تٷسكەن Rams Beyond اتتى 40 قاباتتى تۇرعىن ٷي كەشەنٸنٸڭ قۇرىلىسى ۋاقىتشا توقتاتىلدى. بۇل تۋرالى مەجٸلٸس دەپۋتاتى باقىتجان بازاربەك حابارلادى.
"بٷگٸن بٸز الماتىداعى 40 قاباتتى RAMS قۇرىلىسىنىڭ-مونتاجداۋ جۇمىستارىن توقتاتتىق! مەنٸڭ رەيدٸم بارىسىندا قالا قۇرىلىسىن باقىلاۋ باسقارماسى نىسانعا قاتىستى رەسمي نۇسقاما تابىس ەتتٸ", – دەپ جازدى دەپۋتات Facebook-تەگٸ پاراقشاسىندا.
Rams كومپانيياسى الماتىدا توعىز قاباتتان بيٸك عيمارات سالۋعا بولمايتىن ايماقتا 40 قاباتتى مۇنارا تۇرعىزىپ جاتقان ەدٸ. بۇل جاعداي قوعامدا ٷلكەن رەزونانس تۋدىردى.
قالالىق ەكٸمدٸك قۇرىلىسقا رۇقساتتى جوبانىڭ «ەرەكشە قۇندىلىعى مەن بٸرەگەيلٸگٸنە» سٷيەنٸپ بەرگەنٸن تٷسٸندٸرگەن. الايدا دەپۋتاتتار مەن كٶرشٸلەس ٷيلەردٸڭ تۇرعىندارى بۇعان قارسى شىقتى.
جاقىن ماڭداعى تۇرعىندار قۇرىلىسقا قارسى پەتيتسييا باستاپ, ونى مٷلدەم توقتاتۋدى تالاپ ەتكەن. قوعام بەلسەندٸلەرٸ مەن كەيبٸر دەپۋتاتتار بۇل نىسان قالا قۇرىلىسى ەرەجەلەرٸن ٶرەسكەل بۇزاتىنىن العا تارتىپ وتىر.
