تۇركىستان وبلىسىندا 2025 جىلدىڭ قىركۇيەك ايىنان باستاپ 31 جەلتوقسانى ارالىعىندا شامامەن 2500-گە جۋىق ازامات ءوز بورىشىن وتەۋ ءۇشىن اسكەري قىزمەتكە جىبەرىلەدى. ولار ق ر قورعانىس مينيسترلىگىنىڭ قارۋلى كۇشتەرىندە، ق ر ۇلتتىق قاۋىپسىزدىك كوميتەتىنىڭ شەكارا قىزمەتىندە، ق ر ۇلتتىق ۇلانىندا، ق ر مەملەكەتتىك كۇزەت قىزمەتىندە جانە ق ر توتەنشە جاعدايلار مينيسترلىگىندە اسكەري بورىشىن وتەۋگە اتتانادى. بۇل تۋرالى وتكەن بريفينگتە تۇركىستان وبلىسىنىڭ قورعانىس ىستەرى جونىندەگى دەپارتامەنتى باستىعىنىڭ ورىنباسارى جاندوس كۇلدەربايەۆ مالىمدەدى،- دەپ حابارلايدى Dalanews.kz
"2025 جىلعى كۇزگى شاقىرۋ ناۋقانىنا تۇركىستان وبلىسىنان ق ر قارۋلى كۇشتەرىنە – 1000-عا جۋىق سارباز، ق ر ۇلتتىق قاۋىپسىزدىك كوميتەتىنىڭ شەكارا قىزمەتىنە – 350-دەن استام جاس، ق ر مەملەكەتتىك كۇزەت قىزمەتىنە – 35 سارباز، ق ر ۇلتتىق ۇلانىنا – 900-دەن اسا ادام، ق ر توتەنشە جاعدايلار مينيسترلىگىنىڭ قۇرىلىمدارىنا – 30 ازامات جىبەرىلەدى. بيىلعى جىلدىڭ شىلدە جانە تامىز ايلارىنان باستاپ شاقىرىلۋشىلارمەن الدىن الا زەردەلەۋ جۇمىستارى جۇرگىزىلدى. ءاربىر شاقىرىلۋشىنىڭ دەنساۋلىعى، ءبىلىمى جانە مورالدىق-پسيحولوگيالىق جاعدايى ەسكەرىلىپ، ولار قارۋلى كۇشتەردىڭ، باسقا دا اسكەرلەر مەن اسكەري قۇرىلىمداردىڭ قاجەتتىلىكتەرىنە قاراي تاعايىندالدى"-دەدى سالا مامانى.
سونداي-اق، ق ر ۇقك تۇركىستان وبلىسى دەپارتامەنتىنىڭ اعا وفيسەرى ەربولات بازارقۇلوۆ وتان الدىندا بورىشىن وتەگەن ازاماتتارعا اسكەردەن كەيىن مەملەكەت تاراپىنان كورسەتىلەتىن قولداۋلار تۋرالى باياندادى.
"ەلىمىزدىڭ ازاماتتارى اسكەري قىزمەتتەن كەيىن ەكى جىل ىشىندە ۇبت ناتيجەسىنسىز اڭگىمەلەسۋ ارقىلى اقىلى نەگىزدە جوو-عا ءتۇسۋ مۇمكىندىگى بار. ۇزدىك اسكەري قىزمەتشىلەرگە مەملەكەتتىك گرانت نەگىزىندە تەگىن جوعارى ءبىلىم الۋ مۇمكىندىگى قاراستىرىلعان. ەمتيحانسىز گرانت نەگىزىندە جوو-نىڭ اسكەري كافەدراسىنا ءتۇسۋ، سونىمەن قاتار ۇزدىك اسكەري قىزمەتشىلەرگە ق ر قورعانىس مينيسترلىگىنىڭ اسكەري وقۋ ورىندارىنا ۇبت ناتيجەسىنسىز ءتۇسۋ مۇمكىندىگى بەرىلگەن. اسكەرگە شاقىرۋ ناۋقانى اشىق فورماتتا جۇرگىزىلەدى. قاجەتتى اقپارات الۋ ءۇشىن ءاربىر ازامات قورعانىس ىستەرى جونىندەگى دەپارتامەنتكە، باسقارمالار مەن بولىمدەرگە جۇگىنە الادى"-دەپ اتاپ ءوتتى سپيكەر.
