ماڭعىستاۋ وبلىسى اكىمدىگىنىڭ قولداۋىمەن قازاقستاننىڭ ستامبۋلداعى باس كونسۋلدىعىنىڭ ۇيىمداستىرۋىمەن دەنساۋلىق ساقتاۋ سالاسىنداعى ىنتىماقتاستىقتى كەڭەيتۋ جانە حالىقارالىق ارىپتەستىكتى ودان ءارى نىعايتۋ ماقساتىندا ماڭعىستاۋلىق دارىگەرلەر تۇركيانىڭ جەتەكشى مەديسينالىق مەكەمەلەرىندە تاعىلىمدامادان ءوتتى،- دەپ حابارلايدى Dalanews.kz
اتالعان باعدارلاما شەڭبەرىندە ماڭعىستاۋ وبلىسىنىڭ حيرۋرگ-ونكولوگ، وتولارينگولوگ دارىگەرلەرىنەن قۇرالعان دەلەگاسيا ستامبۋل قالاسىنداعى «Hisar Hospital» مەديسينا ورتالىعىندا جانە «Medicana Health Group» كلينيكاسىندا كاسىبي ءبىلىمىن جەتىلدىرىپ، تاجىريبە الماستى.
دارىگەرلەر قۇرامىندا ماڭعىستاۋ وبلىستىق ونكولوگيا ورتالىعىنىڭ ساۋلەلىك-تەراپيا ءبولىمىنىڭ دارىگەرى، ونكولوگ گۇلزيرا قۇدابايەۆا، حيرۋرگ-ونكولوگ دارىگەر نۇرپەيىس جاقسىباي، بەينەۋ كوپبەيىندى ورتالىق اۋداندىق اۋرۋحاناسىنىڭ ونكولوگ دارىگەرى نۇربولات ىزبەرگەنوۆ، ءتۇپقاراعان ورتالىق اۋداندىق اۋرۋحاناسىنىڭ ونكولوگ دارىگەرى اياگوز مولدابەكوۆا، ماڭعىستاۋ وبلىستىق كوپبەيىندى اۋرۋحاناسىنىڭ حيرۋرگ-دارىگەرى ساعات ءبىتىموۆ، وتولارينگولوگ-دارىگەر دۋلات مايەمەر، ۋرولوگ-دارىگەر قايرات نۇرالييەۆ جانە №2 اقتاۋ قالالىق ەمحاناسىنىڭ حيرۋرگ-دارىگەرى ايزادا قوسبوسينوۆا بار.
تاعىلىمداما اياسىندا ماماندار زاماناۋي تەحنولوگيالاردى قولدانۋ، كۇردەلى وتالاردى جۇرگىزۋ جانە حالىقارالىق ستاندارتتارعا ساي مەديسينالىق كومەك كورسەتۋ ادىستەرىن مەڭگەرۋگە باعىتتالعان.
- ماڭعىستاۋدان بارعان دارىگەرلەر ستامبۋلدىڭ «Hisar Hospital» مەديسينا ورتالىعى مەن «Medicana Health Group» كلينيكاسىندا كاسىبي بىلىمدەرىن جەتىلدىردى. ىشكى قىزمەتى، بولىمشەلەردىڭ جۇمىسىمەن تانىستىق. ءار مامان وزىنە تيەسىلى وتالارعا قاتىسىپ، تاجىريبەلەرىن شىڭدادى. تۇرىك دارىگەرلەرمەن بىرلەسىپ، ءبىر كۇن قابىلداۋ بولىمىندە بولىپ، ناۋقاستارعا تەكسەرۋ جۇمىسىن جۇرگىزدىك. وسىنداي مۇمكىندىك ۇسىنعان باسشىلارعا العىس بىلدىرەمىز، - دەدى №2 اقتاۋ قالالىق ەمحاناسىنىڭ تەراپيالىق جانە حيرۋرگيالىق بەيىندەگى مامانداندىرىلعان كومەك ءبولىمىنىڭ مەڭگەرۋشىسى ايزادا قوسبوسينوۆا.
ايتا كەتەيىك، مەديسينالىق تۋر اياسىنداعى بۇل ساپار ءوڭىر دارىگەرلەرىنىڭ كاسىبي دەڭگەيىن ارتتىرىپ، شەتەلدىك تاجىريبەنى كۇندەلىكتى جۇمىسقا ءتيىمدى ەنگىزۋگە مۇمكىندىك بەرەدى.
بۇگىن، 20-28 تامىز ارالىعىندا وتكەن كۋرس ءوز مارەسىنە جەتىپ، قاتىسۋشىلارعا ارنايى سەرتيفيكات تابىستالدى. مۇنداي تاعىلىمدامالار وبلىس مەديسيناسىن دامىتۋدا ماڭىزدى ءرول اتقارىپ، حالىققا كورسەتىلەتىن مەديسينالىق قىزمەت ساپاسىن ارتتىرۋعا باعىتتالعان.
