Mańǵystaý oblysy ákimdiginiń qoldaýymen Qazaqstannyń Stambýldaǵy bas konsýldyǵynyń uiymdastyrýymen densaýlyq saqtaý salasyndaǵy yntymaqtastyqty keńeitý jáne halyqaralyq áriptestikti odan ári nyǵaitý maqsatynda mańǵystaýlyq dárigerler Túrkiianyń jetekshi meditsinalyq mekemelerinde taǵylymdamadan ótti,- dep habarlaidy Dalanews.kz
Atalǵan baǵdarlama sheńberinde Mańǵystaý oblysynyń hirýrg-onkolog, otolaringolog dárigerlerinen quralǵan delegatsiia Stambýl qalasyndaǵy «Hisar Hospital» meditsina ortalyǵynda jáne «Medicana Health Group» klinikasynda kásibi bilimin jetildirip, tájiribe almasty.
Dárigerler quramynda Mańǵystaý oblystyq onkologiia ortalyǵynyń sáýlelik-terapiia bóliminiń dárigeri, onkolog Gúlzira Qudabaeva, hirýrg-onkolog dáriger Nurpeiis Jaqsybai, Beineý kópbeiindi ortalyq aýdandyq aýrýhanasynyń onkolog dárigeri Nurbolat Izbergenov, Túpqaraǵan ortalyq aýdandyq aýrýhanasynyń onkolog dárigeri Aiagóz Moldabekova, Mańǵystaý oblystyq kópbeiindi aýrýhanasynyń hirýrg-dárigeri Saǵat Bitimov, otolaringolog-dáriger Dýlat Maiemer, ýrolog-dáriger Qairat Nuraliev jáne №2 Aqtaý qalalyq emhanasynyń hirýrg-dárigeri Aizada Qosbosinova bar.
Taǵylymdama aiasynda mamandar zamanaýi tehnologiialardy qoldaný, kúrdeli otalardy júrgizý jáne halyqaralyq standarttarǵa sai meditsinalyq kómek kórsetý ádisterin meńgerýge baǵyttalǵan.
- Mańǵystaýdan barǵan dárigerler Stambýldyń «Hisar Hospital» meditsina ortalyǵy men «Medicana Health Group» klinikasynda kásibi bilimderin jetildirdi. Ishki qyzmeti, bólimshelerdiń jumysymen tanystyq. Ár maman ózine tiesili otalarǵa qatysyp, tájiribelerin shyńdady. Túrik dárigerlermen birlesip, bir kún qabyldaý bóliminde bolyp, naýqastarǵa tekserý jumysyn júrgizdik. Osyndai múmkindik usynǵan basshylarǵa alǵys bildiremiz, - dedi №2 Aqtaý qalalyq emhanasynyń terapiialyq jáne hirýrgiialyq beiindegi mamandandyrylǵan kómek bóliminiń meńgerýshisi Aizada Qosbosinova.
Aita keteiik, meditsinalyq týr aiasyndaǵy bul sapar óńir dárigerleriniń kásibi deńgeiin arttyryp, sheteldik tájiribeni kúndelikti jumysqa tiimdi engizýge múmkindik beredi.
Búgin, 20-28 tamyz aralyǵynda ótken kýrs óz máresine jetip, qatysýshylarǵa arnaiy sertifikat tabystaldy. Mundai taǵylymdamalar oblys meditsinasyn damytýda mańyzdy ról atqaryp, halyqqa kórsetiletin meditsinalyq qyzmet sapasyn arttyrýǵa baǵyttalǵan.
