ۇلتتىق بانك قازاقستاندىقتاردىڭ بانكتىك شوتىنان ۇرلانعان قاراجاتتى قايتارۋ پروسەسىن ەداۋىر جەڭىلدەتەتىن تۇزەتۋلەر ەنگىزىلگەنىن مالىمدەدى. ەندى كۇدىكتى وپەراسيالار بويىنشا بۇعاتتالعان اقشانى قايتارۋ ءۇشىن سوت شەشىمى تالاپ ەتىلمەيدى، دەپ حابارلايدى Dalanews.kz.
قاراجات تەرگەۋ ورگانى جىبەرگەن حابارلاما مەن پروكۋروردىڭ سانكسياسى نەگىزىندە قايتارىلادى. بۇعان دەيىن مۇنداي قاراجاتتى قايتارۋ سوت قاراۋىنىڭ ۇزاقتىعىنا بايلانىستى بىرنەشە ايعا سوزىلىپ كەتەتىن.
سونىمەن قاتار انتيفرود ورتالىعى جانىنان الاياقتىق وپەراسيالارعا قاتىسى بار كارتالار مەن ەلەكتروندى ءاميانداردىڭ ءبىرىڭعاي دەرەكتەر قورى قۇرىلادى. كۇدىكتى ترانزاكسيالاردى بۇعاتتاۋ مەرزىمى 3 جۇمىس كۇنىنەن 5 كۇنگە ۇزارتىلدى. بۇل بانكتەرگە قوسىمشا تەكسەرۋ جۇرگىزۋگە مۇمكىندىك بەرەدى.
الاياقتىق كۇدىگىمەن ۋاقىتشا بۇعاتتالعان شوت يەلەرى الەۋمەتتىك تولەمدەرگە: زەينەتاقىعا، جاردەماقىعا، ستيپەندياعا جانە ەڭبەكاقىعا قولجەتىمدىلىگىن ساقتاپ قالادى.
سونداي-اق زاڭ ءوز دەرەكتەرىن قاساقانا قىلمىسكەرلەرگە بەرۋدى بىلدىرەتىن "دروپپەرلىككە" قىلمىستىق جاۋاپكەرشىلىك ەنگىزەدى. بۇل كولەڭكەلى قارجى اينالىمىنا جانە اقشانى جىلىستاتۋعا قارسى كۇرەسكە باعىتتالعان شارا.
"بۇل وزگەرىستەر الاياقتىققا، ەسىرتكى ساۋداسىنا، قارجى پيراميدالارىنا جانە زاڭسىز ويىن بيزنەسىنە قارسى كۇرەستى كۇشەيتىپ، الاياقتىق ارەكەتتەرگە جەدەل جاۋاپ قايتارۋعا مۇمكىندىك بەرەدى"، — دەدى ۇلتتىق بانك ءتوراعاسىنىڭ ورىنباسارى بەرىك شولپانقۇلوۆ.
الداعى ۋاقىتتا انتيفرود ورتالىعىنىڭ جۇمىسىنا جاساندى ينتەللەكت تەحنولوگيالارىن ەنگىزۋ جوسپارلانىپ وتىر. بۇل جۇيە كۇدىكتى اۋدارىمداردى اۆتوماتتى تۇردە انىقتاپ، بانكتەر اراسىنداعى دەڭگەيدە بۇعاتتاۋعا جول اشادى. ورتالىق باس پروكۋراتۋرامەن، ۇقك-مەن، سيفرلىق دامۋ مينيسترلىگىمەن جانە ءموبيلدى وپەراتورلارمەن تىعىز بايلانىستا جۇمىس ىستەمەك.
