Instagram-دا ۇتىس ويىنىن ۇيىمداستىرعان بلوگەرلەر ەربولات جانابىلوۆ پەن ەلميرا تولەگەنوۆاعا قاتىستى داۋ سوتقا جەتتى. ءىستى استانانىڭ مامانداندىرىلعان اۋدانارالىق اكىمشىلىك سوتى قارايدى، دەپ حابارلايدى Dalanews.kz.
تۋريزم جانە سپورت مينيسترلىگىنىڭ لوتەرەيا جانە ويىن بيزنەسىن رەتتەۋ كوميتەتى جانابىلوۆتار وتكىزگەن ۇتىس ويىندارىنا قاتىستى تەكسەرىس باستاعان.
كوميتەتتىڭ مالىمەتىنشە، ەربولات جانابىلوۆتىڭ پاراقشاسىندا كۇن سايىن اقشا، كولىك جانە وزگە دە باعالى سىيلىقتار تىگىلگەن ۇتىس ويىندارى وتكىزىلگەن. مۇنداي ارەكەتتەر لوتەرەيا قىزمەتىن رەتتەيتىن زاڭناما تالاپتارىنا قايشى كەلۋى مۇمكىن (اكىمشىلىك قۇقىقبۇزۋشىلىق تۋرالى كودەكستىڭ 445-1-بابى).
"وسىعان بايلانىستى 26 تامىز كۇنى جانابىلوۆقا قاتىستى اكىمشىلىك قۇقىقبۇزۋشىلىق تۋرالى كودەكستىڭ 445-1-بابىنىڭ 6-بولىگىمەن حاتتاما تولتىرىلدى. ادۆوكاتىنىڭ ءوتىنىشى بويىنشا ءىس استانانىڭ مامانداندىرىلعان اۋدانارالىق اكىمشىلىك سوتىنا جولداندى"، – دەپ حابارلادى مينيسترلىك Tengrinews.kzء-تىڭ رەسمي ساۋالىنا بەرگەن جاۋابىندا.
كوميتەت وكىلدەرى ەربولات جانابىلوۆتىڭ جۇبايى ەلميرا تولەگەنوۆانىڭ دا ىس-ارەكەتتەرىنە تەكسەرىس جۇرگىزىلىپ جاتقانىن ايتتى. قورىتىندىسى بويىنشا ءتيىستى شەشىم قابىلدانباق.
ۆەدومستۆو دەرەگىنشە، الەۋمەتتىك جەلىلەردە زاڭسىز لوتەرەياعا ۇقسايتىن ۇتىس ويىندارى تۋرالى شاعىمدار ءجيى تۇسەدى.
"2024 جىلى Instagram، TikTok، WhatsApp ارقىلى زاڭسىز ۇتىس ويىندارىن ۇيىمداستىرعان 101 جەكە تۇلعا اكىمشىلىك جاۋاپكەرشىلىككە تارتىلىپ، 43 ملن تەڭگە ايىپپۇل سالىندى. ال 2025 جىلى 72 ادامعا 30 ملن تەڭگەدەن استام ايىپپۇل سالىندى"، – دەدى كوميتەت.
