قارجىلىق مونيتورينگ اگەنتتىگىنىڭ استانا قالاسى بويىنشا دەپارتامەنتى «Samruk-Kazyna Construction» اق باسقارۋشى ديرەكتورى مەن «دورسترويترەست» ج ش س باسشىسىنا قاتىستى تەرگەپ-تەكسەرۋدى اياقتادى، دەپ حابارلايدى Dalanews.kz.
ولار «كوك-توبە» كوپپاتەرلى تۇرعىن ءۇي كەشەنىنىڭ قۇرىلىسىنا بولىنگەن بيۋدجەت قاراجاتىن جىمقىردى دەگەن كۇدىككە ءىلىندى.
2022 جىلعى قاڭتاردا «Samruk-Kazyna Construction» اق مەن «دورسترويترەست» ج ش س اراسىندا قۇرىلىسقا ينۆەستيسيا سالۋ تۋرالى كەلىسىمشارت جاسالىپ، 2،6 ملرد تەڭگە كولەمىندە اۆانس تولەنگەن.
الايدا قۇرىلىس جۇمىستارى بەلگىلەنگەن مەرزىمدە اياقتالماعان جانە ورەسكەل بۇزۋشىلىقتارمەن جۇرگىزىلگەن. ال اۆانس كۇدىكتىلەر تاراپىنان قۇرىلىسقا قاتىسى جوق قارىزداردى وتەۋگە جانە اۆتوكولىك ساتىپ الۋعا جۇمسالعان.
سونىمەن قاتار، 650 ملن تەڭگە جالعان شارتتار ارقىلى كومپانيالاردىڭ شوتتارىنا اۋدارىلىپ، قولما-قول اقشاعا اينالدىرىلعان.
قىلمىستىق جولمەن الىنعان كىرىسكە 23 ملن تەڭگە تۇراتىن ەكى اۆتوكولىك ساتىپ الىنىپ، ولاردى تاركىلەۋدەن جاسىرۋ ماقساتىندا سەنىمدى ادامداردىڭ اتىنا راسىمدەلگەن.
سوت سانكسياسىمەن كۇدىكتىلەردىڭ 170 ملن تەڭگە تۇراتىن بارلىق مۇلكىنە – 5 اۆتوكولىك پەن استاناداعى پاتەرگە تىيىم سالىندى.
كۇدىكتىلەرگە قاتىستى قاماۋدا ۇستاۋ تۇرىندەگى بۇلتارتپاۋ شاراسى تاڭدالدى.
«Samruk-Kazyna Construction» اق-نىڭ بۇرىنعى باسقارۋشى ديرەكتورى حالىقارالىق ىزدەۋگە جاريالاندى.
