رەسەيلىك تەلەجۇرگىزۋشى تينا كاندەلاكي قازاقستان مەن ۇلىبريتانيا اراسىنداعى اسكەري ارىپتەستىككە قاتىستى پىكىر ءبىلدىرىپ، بۇل قادام ماسكەۋگە دوستىقتىڭ بەلگىسى ەمەس ەكەنىن اشىق ايتتى، دەپ حابارلايدى Dalanews.kz.
كاندەلاكي استانا مەن لوندون اراسىنداعى اسكەري كەلىسىمگە 6 ماۋسىم، جۇما كۇنى قول قويىلعانىن ەرەكشە اتاپ ءوتتى.
"ەگەر ءبىر جاڭالىقتىڭ جۇرت نازارىنا ىلىكپەگەنىن قالاساڭ، ونى جۇما كۇنى كەشكە جاريالا"، – دەدى ول.
ونىڭ ايتۋىنشا، كەلەسى جەكسەنبىدە قورعانىس ءمينيسترىنىڭ قىزمەتتەن بوساتىلۋى "بۇل كەلىسىمدى جاسىرۋ ارەكەتىنىڭ ءبىر دالەلى" بولۋى مۇمكىن. سونىمەن بىرگە، دەمالىس كۇندەرى اتالعان جاڭالىق قازاقستان قورعانىس مينيسترلىگىنىڭ سايتىنان الىنىپ تاستالعانىن دا اتاپ ءوتتى.
"رەسەيدىڭ باستى جاۋلارى تىزىمىندە تۇرعان ەلمەن اسكەري ارىپتەستىك ورناتۋ – بۇل تەمىرجول ستانسيالارىن قايتا اتاۋدان الدەقايدا ماڭىزدى. بىلتىر ءدال سول ستانسيا اتاۋلارى ءۇشىن مەنى قازاقستاننىڭ №1 جاۋى دەپ جاريالاعان ەدى.
ونىڭ ۇستىنە قازاقستان – ۇقشۇ مۇشەسى. بۇل اسكەري وداق 2021 جىلعى قاڭتاردا پرەزيدەنت توقايەۆ پەن ونىڭ اينالاسىن اسكەري توڭكەرىستەن قۇتقارعان. ۆەنگريا نەمەسە سلوۆاكيا ەو-نىڭ سىرتقى ساياساتىنا كەلىسپەگەن كۇننىڭ وزىندە رەسەيمەن اسكەري كەلىسىمگە بارا قويماس ەدى. ال رەسەيگە دوستىق تانىتىپ جۇرگەن قازاقستان بريتانيامەن اشىق اسكەري ارىپتەستىك ورناتىپ وتىر. بۇلاي باستاعانداردىڭ سوڭى جاقسى بولماعان. قازاقستاندا، ءسىرا، تاريح وقىتىلمايدى. بالكىم، تەك ويدان شىعارىلاتىن بولار"، – دەپ قوستى كاندەلاكي.
ايتا كەتەيىك، 6 ماۋسىمدا قازاقستان مەن ۇلىبريتانيانىڭ قورعانىس ۆەدومستۆولارى اراسىندا اسكەري ىنتىماقتاستىق جوسپارىنا قول قويىلعانى حابارلاندى. قۇجاتتا كورسەتىلگەن باستى باعىتتار – بىتىمگەرلىك قىزمەت، تىلدىك دايىندىق جانە قازاقستاندىق اسكەري قىزمەتشىلەردى ۇلىبريتانيانىڭ جوعارى اسكەري وقۋ ورىندارىندا وقىتۋ.
ەسكە سالايىق، كاندەلاكي بۇعان دەيىن قىرعىزستان مەن قازاقستانعا "تيىسكەن" بولاتىن. ول ەكى ەلدە ورىس ءتىلى شەتتەتىلىپ جاتقانىن ايتىپ، ارتىنشا جازباسىن ءوشىرىپ تاستاعان بولاتىن.
تينا كاندەلاكي ءوزىنىڭ Telegram-ارناسىندا “قازاقستاندا ورىس ءتىلى اقىرىن ىعىستىرىلىپ جاتقانىن” ايتىپ، جازبا جاريالاعان بولاتىن. مۇندا ول قازاقتاردى “ماڭگۇرتكە” تەڭەگەن ەدى.
وسى تۇستا اشۋعا بۋلىققان قازاقستاندىقتار تينا كاندەلاكيگە تيەسىلى كومپانيا ءونىمىن سايتتان الىپ تاستاۋدى تالاپ ەتىپ، ونى ساتىپ الماۋعا شاقىردى.ناتيجەسىندە رەسەيلىك تەلەجۇرگىزۋشىنىڭ كاسىبىنە ەلىمىزدەگى ارنايى ساۋدا الاڭدارىندا شەكتەۋ قويىلدى.
ارتىنشا تينا كاندەلاكيدىڭ بيزنەسى قازاقستاندا توقتاپ قالدى. “زولوتوە يابلوكو” ساۋدا جەلىسىنىڭ قازاقستانداعى ونلاين-كاتالوگىنان تينا كاندەلاكيگە تيەسىلى “Ansaligy” كوسمەتيكا برەندىنىڭ ونىمدەرى جوعالىپ كەتتى. ونى كاندەلاكي "يننوۆاسيالىق" دەپ اتاپ كەلگەن.
سونىمەن قاتار، كاندەلاكيدىڭ سوزىنشە، قىرعىزستان بيلىگى ءبىر جىلدان بەرى بىشكەكتەگى ءتورت اۋداننىڭ اتىن وزگەرتۋ بويىنشا جۇمىستار جۇرگىزىپ جاتىر ەكەن.
"بىشكەكتەگى اۋدانداردا كسرو كەزىنەن ساقتالعان ورىسشا كەرەمەت اتاۋلارمەن اتالعان: پەرۆومايسكيي، وكتيابرسكيي، لەنينسكيي، سۆەردلوۆسكيي. قىرعىزستاندىق دەپۋتاتتار بۇل (اۋدان اتاۋلارىن وزگەرتۋ) "ۇلتتىق يدەولوگيانى نىعايتۋ، سونداي-اق، تاريحي داستۇرلەر مەن قۇندىلىقتار نەگىزىندە ازاماتتاردىڭ رۋحاني-ادامگەرشىلىك تاربيەسىن جاقسارتۋ ماقساتىندا" دەپ ۇسىنىپ وتىر. قىرعىزستان حالقىنىڭ كوبى قىرعىز تىلىندە ەمەس، ورىس تىلىندە سويلەسە، قايداعى يدەولوگيا؟! ءبارىن قيىنداتۋدىڭ نە قاجەتى بار؟" - دەيدى تينا كاندەلاكي جازباسىندا.
تەلەجۇرگىزۋشى جازباسىندا ءدال وسىلاي ۋكراينادا دەكوممۋنيزاسيا باستالعانىن، ول بۇكىل ورىس تىلىنەن باس تارتۋ كومپانياسىنا اينالعانىن ايتادى.
ءبىراق تينا كاندەلاكي بۇل جازباسىن ءوشىرىپ تاستاعان.
ارتىنشا تينا كاندەلاكيگە قازاقستانعا كىرۋگە تىيىم سالىندى. رەسەيلىك تەلەجۇرگىزۋشى جانە «گازپروم-مەديا» باس ديرەكتورىنىڭ ورىنباسارى تينا كاندەلاكي ەۋرووداق سانكسيالارىنا ىلىكتى. ونىمەن بىرگە سانكسيالىق تىزىمگە ءانشى لاريسا دولينا دا ەنگىزىلدى.
«كوممەرسانت» حابارلاۋىنشا، ولار سانكسيا سالىنعان 16 رەسەيلىكتىڭ قاتارىندا. بۇل شەشىم ەۋروپالىق كەڭەس بەكىتكەن 15ء-شى شەكتەۋ پاكەتى اياسىندا قابىلداندى.
سانكسيالار بويىنشا ەو ەلدەرىنە كىرۋگە جانە ولاردىڭ اۋماعىندا جۇرۋگە تىيىم سالىنادى. سونىمەن قاتار، ەۋروپالىق بانكتەردەگى شوتتارى بۇعاتتالادى جانە كەز كەلگەن قارجىلىق وپەراسيالارعا تىيىم سالىنادى.
