الماتىداعى Orda City تۇرعىن ءۇي كەشەنى سوت شەشىمىمەن بۇزىلىپ جاتىر،- دەپ حابارلايدى Dalanews.kz
بۇگىن قالالىق قۇرىلىس باقىلاۋ باسقارماسى «تەرەكتى» شاعىناۋدانىنداعى اينالما كوشەسى، 183-ۋچاسكەدە ورنالاسقان زاڭسىز نىساندى بۇزۋ باستالعانىن حابارلادى. بۇعان دەيىن بۇل تۇرعىن ءۇي كەشەنى باق-تا پاتەر ساتىپ الۋعا ۇسىنىلمايتىن تۇرعىن ۇيلەر تىزىمىندە كورسەتىلگەن بولاتىن.
انىقتالعانداي، قۇرىلىس سالۋشى – «Investment Stroy» ج ش س اتالعان تۇرعىن ءۇي كەشەنىن رۇقساتسىز سالعان. بۇل فاكت جوسپاردان تىس تەكسەرۋ بارىسىندا انىقتالعان.
مەنشىك يەسىنە قاتىستى اكىمشىلىك شارالار قابىلدانىپ، كەيىن الماتى قالاسىنىڭ مامانداندىرىلعان اۋدانارالىق ەكونوميكالىق سوتىنا (سمەس) نىساندى بۇزۋ جانە شۇڭقىردى قايتا كومىپ تاستاۋ جونىندە تالاپ ارىز بەرىلگەن.
"2023 جىلعى 12 شىلدەدە سوت قۇرىلىس باقىلاۋ باسقارماسىنىڭ تالاپتارىن قاناعاتتاندىردى. اپەللياسيالىق شاعىم قارالعاننان كەيىن الماتى قالالىق سوتى سمەس شەشىمىن وزگەرىسسىز قالدىردى. ءىس ماتەريالدارى ورىنداۋ ءۇشىن ادىلەت دەپارتامەنتىنە جىبەرىلدى"، - دەلىنگەن حابارلامادا.
نىساندى بۇزۋ جۇمىستارى كەشە سوت ورىنداۋشىلارىنىڭ قاتىسۋىمەن باستالدى.
قالالىق قۇرىلىس باقىلاۋ باسقارماسى ازاماتتارعا جىلجىمايتىن مۇلىك ساتىپ الماس بۇرىن تۇرعىن ءۇي كەشەنىنە قاتىستى بارلىق قۇجاتتاردىڭ بولۋىن مىندەتتى تۇردە تەكسەرۋدى ۇسىنادى.
اقپاراتتى WhatsApp انىقتامالىق ارناسى ارقىلى الۋعا بولادى: +7 705 89 66 000.
