ەكس-سۋديا جولمانوۆا سوڭعى ءسوز ايتۋ ءۇشىن سوتقا كەلمەدى. بۇگىنگى سوت وتىرىسىندا ايىپتالۋشىلاردىڭ سوڭعى ءسوز ايتۋى جوسپارلانعان بولاتىن، دەپ حابارلايدى Dalanews.kz.
الايدا سۆەتلانا جولمانوۆا بۇل قۇقىقتى پايدالانىپ، سوتقا بارۋدان باس تارتتى. ايىپتالۋشى كەلمەگەندىكتەن، سوت ءىستى ونىڭ قاتىسۋىنسىز قاراۋدى جالعاستىردى.
ءىستىڭ تاعى ءبىر فيگۋرانتى دانيار كۋشالييەۆ سوتتان بوستاندىعىنان ايىرمايتىن جازا تاعايىنداۋدى سۇرادى.
وسىدان كەيىن سوت كەڭەسۋ بولمەسىنە كەتتى.
سۆەتلانا جولمانوۆا اسا ءىرى كولەمدەگى الاياقتىق جاسادى دەپ ايىپتالۋدا. تەرگەۋ نۇسقاسىنا سايكەس، 2021–2024 جىلدار ارالىعىندا ول جىلجىمايتىن مۇلىك ساتىپ الۋعا جانە تەندەرلىك جوبالارعا قاتىسۋعا كومەكتەسەمىن دەگەن سىلتاۋمەن 1 ميلليارد تەڭگەدەن استام قاراجاتتى يەمدەنگەن. بارلىعى 48 ەپيزود ءبىر وندىرىسكە بىرىكتىرىلگەن.
بۇل ءىس تۋرالى نە بەلگىلى؟
سۆەتلانا جولمانوۆاعا قاتىستى ءىس الماتىداعى مەدەۋ اۋداندىق №2 سوتىندا قارالىپ جاتىر. وعان 1 ملرد تەڭگەنى الاياقتىق جولمەن يەمدەندى دەگەن ايىپ تاعىلعان. تەرگەۋ نۇسقاسىنا ساي ول ءتۇرلى تەندەرلەر مەن جىلجىمايتىن مۇلىك مامىلەلەرىنە كومەكتەسەمىن دەپ، وعان قوسا ەكس-اكىمنىڭ ايەلىمەن ارالاسامىن دەگەن سىلتاۋمەن ادامداردى الداعان. جۇمىستان كەتكەن سوڭ دا ءوزىن سۋديا رەتىندە تانىستىرىپ، اقشا بوپسالاۋدى جالعاستىرعان. قازىرگى تاڭدا 48 ەپيزود تىركەلگەن، جابىرلەنۋشىلەر اراسىندا سۋديالار دا بار.
ەكىنشى ايىپتالۋشى - بۇرىنعى پوليسەي دانيار قۇشالييەۆ. ب ا ق مالىمەتىنشە، ول بۇعان دەيىن پارا الۋ دەرەگى بويىنشا ۇستالعان.
بۇعان دەيىنگى ىستەرى
ايتا كەتەيىك، 2021 جىلدىڭ 28 ساۋىرىندە الماتى قالاسى مەدەۋ اۋداندىق سوتىنىڭ سۋدياسى سۆەتلانا جولمانوۆا الاياقتىق جاسادى دەگەن كۇدىككە ءىلىندى.
ءتىنتۋ كەزىندە سۋديانىڭ كابينەتىنەن 10 مىڭ دوللار تاركىلەنگەن. ول سوت شەشىمدەرىن بەلگىلى ءبىر ادامداردىڭ پايداسىنا شىعارۋعا كومەكتەسكەن دەگەن كۇدىككە ءىلىندى.
29 ساۋىردە جوعارعى سوت ءتوراعاسىنىڭ وكىمىمەن سۆەتلانا جولمانوۆانىڭ وكىلەتتىگى توقتاتىلدى.
