2025 جىلعى 2–7 ماۋسىم ارالىعىندا ساتبايەۆ ۋنيۆەرسيتەتى اۆتوماتيكا جانە اقپاراتتىق تەحنولوگيالار ينستيتۋتىنىڭ ەلەكترونيكا، تەلەكوممۋنيكاسيالار جانە عارىشتىق تەحنولوگيالار كافەدراسىنىڭ قاۋىمداستىرىلعان پروفەسسورى، يرن № AP19679041 گرانتتىق جوباسىنىڭ جەتەكشى عىلىمي قىزمەتكەرى اينۇر قۇتتىبايەۆا سانكت-پەتەربۋرگ پوليتەحنيكالىق ۋنيۆەرسيتەتىنە (رەسەي) جۇمىس ساپارىمەن باردى.
اتالعان جوبا «مەتالل جانە بەتون كونسترۋكسيالارىنىڭ كەرنەۋ كۇيىن باقىلاۋعا ارنالعان تالشىقتى-وپتيكالىق داچيكتەردى زەرتتەۋ جانە قولدانۋ» (2023–2025 جج.) تاقىرىبىندا جۇزەگە اسىرىلۋدا.
ساپار بارىسىندا اينۇر قۇتتىبايەۆا سانكت-پەتەربۋرگ پوليتەحنيكالىق ۋنيۆەرسيتەتىنىڭ حالىقارالىق ءبىلىم بەرۋ باعدارلامالارى جوعارى مەكتەبىنىڭ ديرەكتورى ۆيكتور بەلكومەن، دوسەنت ۆيكتور ماليۋگينمەن، پروفەسسور دميتريي كيزيەۆەتتەرمەن جانە ۋنيۆەرسيتەتتىڭ عىلىمي-زەرتتەۋ بولىمشەلەرىنىڭ وكىلدەرىمەن كەزدەسۋلەر وتكىزدى. سونداي-اق ول پەرسپەكتيۆالىق ەلەكتر وقشاۋلاۋ جۇيەلەرىنىڭ عىلىمي-ينجەنەرلىك ورتالىعىندا جانە سۋاستى مۇناي-گاز ءوندىرۋ سالاسىنا ارنالعان يمپۋلستىك تەحنولوگيالار زەرتحاناسىندا بولدى.
كەزدەسۋ بارىسىندا گرانتتىق جوبا اياسىندا تالشىقتى-وپتيكالىق تەحنولوگيالاردى پايدالانا وتىرىپ، جوعارى جىلدامدىقتاعى دەفورماسيالاردى ولشەۋدىڭ يننوۆاسيالىق ادىستەرىن ازىرلەۋگە باعىتتالعان عىلىمي ىنتىماقتاستىقتىڭ پەرسپەكتيۆالارى مەن بىرلەسكەن جۇمىستىڭ ىقتيمال باعىتتارى تالقىلاندى. مۇنداي تەحنولوگيالار ينجەنەرلىك قۇرىلىمداردىڭ سەنىمدىلىگى مەن قاۋىپسىزدىگىن ارتتىرۋدا ماڭىزدى ءرول اتقارادى. اسىرەسە ولاردى كوپىرلەردىڭ جاي-كۇيىن باقىلاۋ جانە عارىش سالاسىندا قولدانۋ مۇمكىندىكتەرى ەرەكشە قىزىعۋشىلىق تۋعىزدى.
ساپار قورىتىندىسى بويىنشا سانكت-پەتەربۋرگ پوليتەحنيكالىق ۋنيۆەرسيتەتىنىڭ باسشىلىعى اينۇر قۇتتىبايەۆاعا عىلىمدى دامىتۋعا جانە حالىقارالىق اكادەميالىق ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن العىس حات تابىس ەتتى.
بۇل ءىسساپار ساتبايەۆ ۋنيۆەرسيتەتى مەن سانكت-پەتەربۋرگ پوليتەحنيكالىق ۋنيۆەرسيتەتى اراسىنداعى عىلىمي ىنتىماقتاستىقتى نىعايتىپ، تەلەكوممۋنيكاسيالىق تەحنولوگيالار سالاسىنداعى حالىقارالىق سەرىكتەستىكتى كەڭەيتۋگە مۇمكىندىك بەردى.
