قازاقستان رەسەي-ۋكراينا سوعىسىنىڭ تاجىريبەسىنە سۇيەنىپ، ءوزىن وتە ءتيىمدى جاعىنان كورسەتكەن درون تيپتەرىن سارالاۋ جۇمىسىن باستاپ كەتتى. ءتيىمدى، ارزان جانە قۇراستىرۋى تەحنولوگيالىق جاعىنان وڭاي درونداردى جاقىن بولاشاقتا كونۆەيەرگە قويۋ كوزدەلگەن، دەپ حابارلايدى Dalanews.kz. DALA INSIDE دەرەككوزىنە سىلتەمە جاساپ. 

"پاۋتينا" وپەراسياسىنان كەيىن درونداردىڭ سوعىس كەلبەتىن وزگەرتكەنىنە اسكەريلەردىڭ تولىق كوزى جەتتى. كولەمى ۇلكەن، باعاسى ۋداي قىمبات ستراتەگيالىق بومبىلاۋشى ۇشاقتاردى قۇنى 100 دوللارلىق شاعىن دروندار قيراتىپ جاتقان كارتينا ۇلكەن دەرجاۆا مەن شاعىن مەملەكەت اراسىنداعى پاريتەتكە ۇلكەن تۇزەتۋ ەنگىزىپ وتىر. اسپانعا ءبىر مەزەتتە ميلليون درون جىبەرە الاتىن شاعىن مەملەكەت كەز-كەلگەن قارسىلاسقا قيىندىق تۋعىزادى. بىزدىكىلەر ءوز شانسىن ەندى ءتۇسىندى"، - دەيدى، DALA INSIDE دەرەككوزى.

ەندى قازاقستان تانك، اۋىر ارتيللەريا مەن سناريادتارعا عانا يەك ارتا بەرمەي، قارجىلاندىرۋدىڭ كولەمدى بولىگىن درونداردى قۇراستىرۋ مەن ساتىپ الۋعا باعىتتايتىن بولادى. دەرەككوزدىڭ ايتۋىنشا، درون قۇراستىراتىن ءوندىرىس قىتايعا جاقىن اۋماقتا ورنالاسۋى ءتيىس. بۇل قوسالقى بولشەكتەردىڭ لوگيستيكاسى مەن قاۋىپسىزدىك جاعىنان وتە دۇرىس شەشىم.

"بۇعان دەيىن قورعانىس مينيسترلىگىندەگى رەسەيشىل باسشىلىق سانالى تۇردە درونداردىڭ سوعىستاعى ماڭىزىن تومەندەتىپ كەلگەن ەدى. وسىنىڭ كەسىرىنەن قازاقستان التىن ۋاقىتىن جوعالتىپ الدى. مۇمكىن قارسىلاسقا قارسى تۇرۋ ءۇشىن ءبىزدىڭ ارسەنالىمىزدا العاشقى ۋاقىتتا 200 مىڭداي ارزان درون بولۋى ءتيىس. كونۆەيەرلى زاۋىت اشىلسا، وسى ماسەلەنى 1-2 جىلدا تۇزەتۋگە بولادى. بولاشاقتا كەمىندە 5 ميلليون درون ۇستاپ وتىرساق، بىزگە اگرەسسيا جاسار الدىندا كەز-كەلگەن مەملەكەت ويلانادى نەمەسە ءبىزدىڭ وسى دروندارىمىزدى ديۆەرسيا ارقىلى قۇرتۋعا تىرىسادى"، - دەيدى، دەرەككوز.

بۇل رەتتە قىتايمەن تەحنولوگيالىق كووپەراسيا اسا قاجەت ەكەنى تۇسىنىكتى. سول سەبەپتى قىتايمەن تىعىز جۇمىس ىستەگەن "قازپوشتا" كومپانياسىنىڭ باسشىسى اسەل جاناسوۆا اقورداعا الدىرىلدى. قورعانىس ءمينيسترى اۋىستى. دەرەككوز ەندى تالانتتى ينجەنەرلەر، پروگرامميستەر، جاساندى ينتەللەكت پەن راديوەلەكتروندى رەجيم ماماندارى ءبىر جەرگە شوعىرلاندىرىلا باستايتىنىن ايتادى.

قازاقستاندىق اسكەري FPV درونداردىڭ العاشقى ءتيپى "قارلىعاش" دەپ اتالۋى مۇمكىن. ول تولىق اۆتونومدى بولادى دەپ كۇتىۋدە. ياعني راديوەلەكتروندى كۇرەس قاتتى دامىعان زاماندا ەشقانداي بايلانىسقا يەك ارتپاي، بورتتاعى جاساندى ينتەللەكت كومەگىمەن ءوز بەتىنشە شەشىم قابىلداپ، جاۋدىڭ اسكەري تەحنيكاسى، نىساندارى مەن سولداتتارىن جويا الاتىن قابىلەتكە يە بولۋى ءتيىس.