Qazaqstan Reseı-Ýkraına soǵysynyń tájirıbesine súıenip, ózin óte tıimdi jaǵynan kórsetken dron tıpterin saralaý jumysyn bastap ketti. Tıimdi, arzan jáne qurastyrýy tehnologıalyq jaǵynan ońaı drondardy jaqyn bolashaqta konveıerge qoıý kózdelgen, dep habarlaıdy Dalanews.kz. DALA INSIDE derekkózine silteme jasap.
"Paýtına" operasıasynan keıin drondardyń soǵys kelbetin ózgertkenine áskerılerdiń tolyq kózi jetti. Kólemi úlken, baǵasy ýdaı qymbat strategıalyq bombylaýshy ushaqtardy quny 100 dollarlyq shaǵyn drondar qıratyp jatqan kartına úlken derjava men shaǵyn memleket arasyndaǵy parıtetke úlken túzetý engizip otyr. Aspanǵa bir mezette mıllıon dron jibere alatyn shaǵyn memleket kez-kelgen qarsylasqa qıyndyq týǵyzady. Bizdikiler óz shansyn endi túsindi", - deıdi, DALA INSIDE derekkózi.
Endi Qazaqstan tank, aýyr artılerıa men snarádtarǵa ǵana ıek arta bermeı, qarjylandyrýdyń kólemdi bóligin drondardy qurastyrý men satyp alýǵa baǵyttaıtyn bolady. Derekkózdiń aıtýynsha, dron qurastyratyn óndiris Qytaıǵa jaqyn aýmaqta ornalasýy tıis. Bul qosalqy bólshekterdiń logıstıkasy men qaýipsizdik jaǵynan óte durys sheshim.
"Buǵan deıin Qorǵanys mınıstrligindegi reseıshil basshylyq sanaly túrde drondardyń soǵystaǵy mańyzyn tómendetip kelgen edi. Osynyń kesirinen Qazaqstan altyn ýaqytyn joǵaltyp aldy. Múmkin qarsylasqa qarsy turý úshin bizdiń arsenalymyzda alǵashqy ýaqytta 200 myńdaı arzan dron bolýy tıis. Konveıerli zaýyt ashylsa, osy máseleni 1-2 jylda túzetýge bolady. Bolashaqta keminde 5 mıllıon dron ustap otyrsaq, bizge agresıa jasar aldynda kez-kelgen memleket oılanady nemese bizdiń osy drondarymyzdy dıversıa arqyly qurtýǵa tyrysady", - deıdi, derekkóz.
Bul rette Qytaımen tehnologıalyq kooperasıa asa qajet ekeni túsinikti. Sol sebepti Qytaımen tyǵyz jumys istegen "Qazposhta" kompanıasynyń basshysy Ásel Janasova Aqordaǵa aldyryldy. Qorǵanys mınıstri aýysty. Derekkóz endi talantty ınjenerler, programmıster, jasandy ıntellekt pen radıoelektrondy rejım mamandary bir jerge shoǵyrlandyryla bastaıtynyn aıtady.
Qazaqstandyq áskerı FPV drondardyń alǵashqy tıpi "Qarlyǵash" dep atalýy múmkin. Ol tolyq avtonomdy bolady dep kútiýde. Iaǵnı radıoelektrondy kúres qatty damyǵan zamanda eshqandaı baılanysqa ıek artpaı, borttaǵy jasandy ıntellekt kómegimen óz betinshe sheshim qabyldap, jaýdyń áskerı tehnıkasy, nysandary men soldattaryn joıa alatyn qabiletke ıe bolýy tıis.
