«ينتەرگاز ورتالىق ازيا» 2024 جىلى باسقارما مۇشەلەرىنە 426،1 ملن تەڭگە تولەگەن. بۇل اقپارات قازاقستان قور بيرجاسىنىڭ (KASE) سايتىندا جاريالانعان حابارلامادا كورسەتىلگەن، دەپ حابارلايدى Dalanews.kz.
جىل بويى باسقارما قۇرامىندا ءتورت ادام بولعانىن ەسكەرسەك، ءار توپ-مەنەدجەرگە ورتا ەسەپپەن اي سايىن 8،8 ميلليون تەڭگەدەن كەلگەن. مۇندا تەك جالاقى ەمەس، سونىمەن قاتار بونۋس پەن باسقا دا تولەم تۇرلەرى قامتىلعان. بۇل تولەمدەردىڭ كولەمى مەن جيىلىگى ءارتۇرلى بولۋى مۇمكىن.
كومپانيا 2024 جىلدىڭ قورىتىندى ەسەبىندە باسقارۋشى پەرسونالعا ءبىر جىل ىشىندە 520،7 ميلليون تەڭگە تولەنگەنىن كورسەتكەن. بۇل سوما باسقارما مۇشەلەرى مەن تاۋەلسىز ديرەكتورلارعا قاتىستى. 2024 جىلعى 31 جەلتوقساندا ولاردىڭ جالپى سانى سەگىز ادام بولعان.
جىل قورىتىندىسى بويىنشا ءتورت باسقارما مۇشەسىنە 426،1 ميلليون تەڭگە تولەنگەنىن ەسكەرسەك، تاۋەلسىز ديرەكتورلار جىل بويى جالپى 94،6 ميلليون تەڭگە العان.
قازىرگى تاڭدا «ينتەرگاز ورتالىق ازيا» سايتىنىڭ دەرەگىنە سۇيەنسەك، كومپانيانىڭ ديرەكتورلار كەڭەسىندە ەكى تاۋەلسىز ديرەكتور بار: ولجاس تلەۋحابىل ۇلى مەن تانباي ناۋشييەۆ. سوڭعىسى ديرەكتورلار كەڭەسىنە 2024 جىلدىڭ قازان ايىندا قوسىلعان. بارلىعى ديرەكتورلار كەڭەسىندە التى ادام بار، ونىڭ ىشىندە كومپانيا باسقارماسىن باسقاراتىن ماناس تاسىبايەۆ تا بار.
«ينتەرگاز ورتالىق ازيا» 1997 جىلعى 1 شىلدەدە تىركەلگەن. كومپانيا «سامۇرىق-قازىنا» قورى ارقىلى QazaqGaz-عا 100% تيەسىلى. وسىلايشا، كومپانيانىڭ تۇپكىلىكتى باقىلاۋشىسى – قازاقستان ۇكىمەتى.
«ينتەرگاز ورتالىق ازيا» كومپانياسىنىڭ نەگىزگى قىزمەت باعىتى – تابيعي گازدى تاسىمالداۋ، ساقتاۋ جانە گاز قۇبىرلارىنا تەحنيكالىق قىزمەت كورسەتۋ قىزمەتتەرىن كورسەتۋ.
