الەۋمەتتىك جەلى قولدانۋشىلارىن تاعى ءبىر ەرەكشە ۆيدەو ءسۇيسىنتتى. كادردا قازاق ءتىلىن ەركىن مەڭگەرگەن، ءتىپتى تۇرمىستىق دەڭگەيدە، ويىن اراسىندا قازاق تىلىندە سويلەسكەن ورىس بالالارى كورىنەدى، دەپ حابارلايدى Dalanews.kz.

ۆيدەو الەۋمەتتىك جەلىلەردە كەڭىنەن تاراپ كەتتى. دەگەنمەن قاي وڭىردە تۇسىرىلگەنى ناقتى كورسەتىلمەگەن. كەيبىرەۋلەر ۆيدەوداعى ديالەكتىلەرگە قاراپ، باتىس وڭىرىندە تۇسىرىلگەن بولۋى مۇمكىن ەكەنىن ايتتى.

كادرلاردا اتا-اناسى دا بالالارمەن قازاق تىلىندە سويلەسكەنى بايقالادى. جەلى قولدانۋشىلارى قازاق تىلىندە ەركىن سويلەگەن بالالاردىڭ ۆيدەوسىنا بەي-جاي قاراماي، ءتۇرلى پىكىر جازعان:

"ءبىزدىڭ وزگە تىلدە سايراپ، ءوز تىلىندە ءتىلىن شاينايتىندارعا كۇنىگە كورسەتەتىن ەكەن..."، "قازاق سىنىبىنا بەرگەن ورىس بالالارى عوي"، "سارى شاشتى التىن قىزدارىمىز. جاي عانا قازاقشا سويلەپ قانا قويماي، داۋىس ىرعاعىمەن، كەرەك سوزدەردى دۇرىس قولدانىپ، اڭگىمەنىڭ ءدامىن كىرگىزىپ ايتادى ەكەن!"، "اتا-اناسىنىڭ اقىلى بار ەكەن، دەمەك بالالارى ءۇشىن بولاشاقتارىن ويلاعان"، "كەلەشەكتە ناعىز قازاقتار وسىلار بولادى. ەگەر بۇل سارى بالاقايلار ۇلكەيگەندە قازاقشا سويلەپ تۇرسا، ءوز ءتىلىن بىلمەيتىن ماڭگۇرت قازاقتار بالكىم بەتتەرى قىزاراتىن بولار، كىم بىلەدى، ولاردىڭ بەتتەرى قالىڭداپ كەتسە ۇيالمايتىن دا شىعار"، - دەدى ولار.

كەي ساراپشىلار بۇل قۇبىلىستى ەلدەگى ءتىل ساياساتىنىڭ بىرتىندەپ ناتيجە بەرە باستاعانىنىڭ بەلگىسى دەپ تە باعالايدى.

مەكتەپتەردە قازاق تىلىنە باسىمدىق بەرىلۋى، قازاق ءتىلدى كونتەنتتىڭ ارتۋى، سونداي-اق، جاستاردىڭ كۇندەلىكتى ورتادا قازاقشا سويلەيتىن دوستارى كوبەيۋى – وسىنىڭ ءبارى اسەر ەتپەي قويمايدى.

ايتا كەتەيىك، الەۋمەتتىك جەلىلەردە مۇنداي ۆيدەولار مەن جازبالار كەڭ تارالىپ، وڭ پىكىرلەر جيناپ جاتادى.