2025 جىلدىڭ 6 ايىندا ادىلەت دەپارتامەنتىنە 3907 قۇجات ءتۇستى، ونىڭ ىشىندە جەكە تۇلعالاردان – 3697، زاڭدى تۇلعالاردان – 210. بۇل تۋرالى وبلىستىق ادىلەت دەپارتامەنتىنىڭ باسشىسى نۇرجان ءاليحان ۇلى مالىمدەدى.
"بيىلعى جىلدىڭ العاشقى جارتىجىلدىعىندا 993 مەملەكەتتىك قىزمەت كورسەتىلدى. ونىڭ 820ء-ى –قاعاز تۇرىندە، 173ء-ى – ەلەكتروندى تۇردە. سونداي-اق، 590 زاڭدى تۇلعا بويىنشا مەملەكەتتىك قىزمەت كورسەتىلىپ، بيۋدجەتكە 1 612 750 تەڭگە قاراجات ءتۇستى.
جىل باسىنان بەرى مەملەكەت كەپىلدىك بەرگەن زاڭ كومەگى بويىنشا دەپارتامەنت تاراپىنان 110 ادۆوكات جانە 23 زاڭ كونسۋلتانتپەن كەلىسىم جاسالىپ، 3592 ازاماتقا تەگىن زاڭ كومەگى كورسەتىلدى.
ال اليمەنت ءوندىرۋ ساناتى بويىنشا 22 813 قۇجات ورىندالۋ بارىسىندا. بۇدان وزگە، 499 بورىشكەرگە ىزدەۋ جاريالانىپ، 256 بورىشكەر اكىمشىلىك جاۋاپكەرشىلىككە تارتىلدى. "بوس ورىندار" جارمەڭكەسى وتكىزىلىپ، 85 بورىشكەر جۇمىسپەن قامتىلدى. مەملەكەت كىرىسىنە جەكە سوت ورىنداۋشىلارمەن 1 519 947 094 تەڭگە جانە مەملەكەتتىك سوت ورىنداۋشىلارمەن 3 111 870 123 تەڭگە ءوندىرىلدى”، - دەدى سپيكەر.
تۇركىستان وبلىسىنىڭ وڭىرلىك كوممۋنيكاسيالار قىزمەتى
