اقمولا وبلىسىنداعى ەرەكشە قىزعىلت ءتۇستى كوبەيتۇز كولىنىڭ تۇزىنا تاعى دا ءقاۋىپ ءتونىپ تۇر. تۋريستەر ەمدىك قاسيەتى بار دەپ ەسەپتەلەتىن تۇزدى جاپپاي قازىپ، ۇيىنە الىپ كەتىپ جاتىر. ءتىپتى كەيبىر دەمالۋشىلار كول جاعاسىنا كۇرەك، شەلەك، قاپ سەكىلدى ارنايى قۇرال-جابدىقپەن كەلىپ، قىزعىلت تۇزدى ءتۇرلى ىدىستارعا سالىپ جاتىر، دەپ حابارلايدى Dalanews.kz.
بۇل جاعداي الەۋمەتتىك جەلىلەرگە تاراعان ۆيدەولاردان كەيىن بەلگىلى بولدى. جەلى قولدانۋشىلارى بۇل ارەكەتتى ەكولوگيالىق جاۋاپسىزدىق دەپ ايىپتاپ، جاۋاپتى ورگانداردان شارا قولدانۋدى تالاپ ەتتى.
ەسكە سالايىق، وسىدان بەس جىل بۇرىن كوروناۆيرۋس پاندەمياسى كەزىندەگى كارانتين شەكتەۋلەرى كەزىندە دە ءدال وسىنداي جاعداي تىركەلگەن بولاتىن. ول كەزدە كولدىڭ ەمدىك قاسيەتى تۋرالى اقپاراتتان سوڭ تۇزدى تاسۋشىلار سانى كۇرت كوبەيگەن. سونىڭ سالدارىنان 35 ادام اكىمشىلىك جاۋاپقا تارتىلىپ، ايىپپۇل سالىنعان ەدى.
اقمولا وبلىستىق پوليسيا دەپارتامەنتى بۇل جولعى ماسەلەنى ەكولوگيا مينيسترلىگىنە جولداعان. ءبىراق مينيسترلىك قۇقىقبۇزۋشىلىق تۋرالى ناقتى مالىمەت جوق ەكەنىن العا تارتىپ، قۇجاتتى كەرى قايتاردى.
"ەكولوگيا دەپارتامەنتىندە جەدەل تەرگەۋ جۇرگىزەتىن قۇزىرەت بولماعاندىقتان جانە قۇقىقبۇزۋشىلاردىڭ جەكە دەرەكتەرى كورسەتىلمەگەندىكتەن، بۇل ءىس ماتەريالدارى 1 تامىز كۇنى پوليسياعا قايتا جىبەرىلدى. سونىمەن قاتار، 1-2 تامىز كۇندەرى ەرەيمەنتاۋ اۋداندىق اكىمدىگى كول اۋماعىندا تۇرعىندار اراسىندا ءتۇسىندىرۋ جۇمىستارىن جۇرگىزىپ، قۇقىقبۇزۋشىلىقتىڭ الدىن الۋ بويىنشا كەزەكتى رەيدتەر وتكىزدى"، – دەپ مالىمدەدى ەكولوگيا مينيسترلىگىنىڭ باسپا ءسوز قىزمەتى.
