ءماجىلىس دەپۋتاتى باقىتجان بازاربەك تاعى ءبىر زاڭسىزدىقتى اشكەرەلەدى، دەپ حابارلايدى Dalanews.kz.
ول باس پروكۋراتۋراعا، اۋىل شارۋاشىلىعى مينيسترلىگىنىڭ جەر رەسۋرستارىن باسقارۋ كوميتەتىنە جانە سۋ رەسۋرستارى جانە يرريگاسيا مينيسترلىگىنە رەسمي تۇردە ءوتىنىش جولداعان.
"قاپشاعاي سۋ قويماسى مەن ىلە وزەنىنىڭ سۋ قورعاۋ بەلدەۋلەرىندە ورنالاسقان 82 جەر ۋچاسكەسى جەكە جانە زاڭدى تۇلعالاردىڭ مەنشىگىنە راسىمدەلىپ كەتكەن! ال مۇنداي جەرلەردى جەكەشەلەندىرۋگە زاڭمەن تىيىم سالىنعان! جەر كودەكسى مەن سۋ كودەكسى بويىنشا سۋ قورعاۋ ايماقتارى مەن ەرەكشە قورعالاتىن تابيعي اۋماقتار (ەقتا) اينالىمعا شىعارىلماۋى ءتيىس. ءبىراق بۇل ۋچاسكەلەر جەكە مەنشىك رەتىندە تىركەلگەنى انىقتالدى"، - دەدى ول.
ونىڭ ايتۋىنشا، قاراپايىم حالىق قاپشاعاي سۋ قويماسى مەن ىلە وزەنىنىڭ ارناسىنا ەركىن وتە الماي وتىر.
"سۋ جاعالاۋى بەتون دۋالدارمەن قورشالعان. بۇل – ازاماتتاردىڭ سۋ رەسۋرستارىنا ەركىن قول جەتكىزۋ قۇقىعىن ورەسكەل بۇزۋ! مەن، ءماجىلىس دەپۋتاتى، جەر سالاسىنىڭ ساراپشىسى رەتىندە، بۇل ماسەلەگە بەي-جاي قاراي المايمىن. جەرلەر مەملەكەتكە قايتارىلۋعا ءتيىس! زاڭسىز بەرىلگەن ۋچاسكەلەردى كىمنىڭ يەمدەنىپ العانى انىقتالادى. ارتىندا لاۋازىمدى، ىقپالدى تۇلعالار تۇرسا دا، زاڭ بارىنە ورتاق!" - دەدى دەپۋتات.
باقىتجان بازاربەك پرەزيدەنت اكىمشىلىگىن جانە باس پروكۋراتۋرانى بۇل ماسەلەنى ەرەكشە باقىلاۋعا الۋعا شاقىردى.
