Májilis depýtaty Baqytjan Bazarbek taǵy bir zańsyzdyqty áshkereledi, dep habarlaidy Dalanews.kz.
Ol Bas prokýratýraǵa, Aýyl sharýashylyǵy ministrliginiń Jer resýrstaryn basqarý komitetine jáne Sý resýrstary jáne irrigatsiia ministrligine resmi túrde ótinish joldaǵan.
"Qapshaǵai sý qoimasy men Ile ózeniniń sý qorǵaý beldeýlerinde ornalasqan 82 jer ýchaskesi jeke jáne zańdy tulǵalardyń menshigine rásimdelip ketken! Al mundai jerlerdi jekeshelendirýge zańmen tyiym salynǵan! Jer kodeksi men Sý kodeksi boiynsha sý qorǵaý aimaqtary men erekshe qorǵalatyn tabiǵi aýmaqtar (EQTA) ainalymǵa shyǵarylmaýy tiis. Biraq bul ýchaskeler jeke menshik retinde tirkelgeni anyqtaldy", - dedi ol.
Onyń aitýynsha, qarapaiym halyq Qapshaǵai sý qoimasy men Ile ózeniniń arnasyna erkin óte almai otyr.
"Sý jaǵalaýy beton dýaldarmen qorshalǵan. Bul – azamattardyń sý resýrstaryna erkin qol jetkizý quqyǵyn óreskel buzý! Men, Májilis depýtaty, jer salasynyń sarapshysy retinde, bul máselege bei-jai qarai almaimyn. Jerler memleketke qaitarylýǵa tiis! Zańsyz berilgen ýchaskelerdi kimniń iemdenip alǵany anyqtalady. Artynda laýazymdy, yqpaldy tulǵalar tursa da, zań bárine ortaq!" - dedi depýtat.
Baqytjan Bazarbek Prezident Ákimshiligin jáne Bas prokýratýrany bul máseleni erekshe baqylaýǵa alýǵa shaqyrdy.
