قايعىلى وقيعا تۋرالى پاۆلودار وبلىسىنىڭ بالا قۇقىقتارى جونىندەگى ۋاكىلى ساۋلە شاكەنوۆا Instagram پاراقشاسىندا حابارلادى.

«وكىنىشكە قاراي، دارىگەرلەر قانشا كۇش سالعانىمەن، ءبۇلدىرشىننىڭ جۇرەگى توقتادى»، – دەپ جازدى ومبۋدسمەن.

پاۆلودار وبلىستىق بالالار اۋرۋحاناسى بۇل اقپاراتتى راستاپ، بالانىڭ 1 تامىز كۇنى كەشكىسىن كوز جۇمعانىن مالىمدەدى.

«2024 جىلى تۋعان بالانىڭ جاعدايى كۇنى بويى وتە اۋىر ءارى تۇراقسىز بولدى. كەشكە قاراي جاعدايى ناشارلاي باستادى. ساعات 20:10-دا جۇرەگى توقتاپ، ساعات 20:40-تا ءولىم تىركەلدى»، – دەپ حابارلادى دارىگەرلەر.

وسىعان دەيىن حابارلانعانداي، ءسابي اۋرۋحاناعا كلينيكالىق ءولىم جاعدايىندا تۇسكەن. دارىگەرلەر ونىڭ جۇرەك سوعىسىن قايتا قالپىنا كەلتىرگەنىمەن، ىشكى قان كەتۋ سەبەبىنەن سول جاق بۇيرەگىن الىپ تاستاۋعا ءماجبۇر بولعان. وپەراسيادان كەيىن جۇرەگى تاعى دا توقتاپ قالعان، ءبىراق مەديسينا ماماندارى ونى قايتا جانداندىرعان ەدى.

بەسىنشى قاباتتان قۇلاعان ءسابي اۋىر باس-مي جاراقاتىن الىپ، ىشكى اعزالارى زاقىمدانعان، سونداي-اق ءۇشىنشى دارەجەلى جاراقاتتىق شوك العان.

جەتى جاسار بالانىڭ جاعدايى جاقسارىپ كەلەدى

سول وقيعادان زارداپ شەككەن ەكىنشى بالا – جەتى جاستاعى ۇلدىڭ جاعدايى وڭالىپ كەلەدى. 31 شىلدە كۇنى ول اۋرۋحانانىڭ تراۆماتولوگيا بولىمىنە اۋىستىرىلدى.

وقيعا قالاي بولعان ەدى؟

جانتۇرشىگەرلىك وقيعا 30 شىلدە كۇنى پاۆلودار قالاسىندا بولدى. 34 جاستاعى ايەل وزىمەن بىرگە ەكى بالاسىن كوپقاباتتى ءۇيدىڭ بەسىنشى قاباتىنان لاقتىرىپ جىبەرىپ، ارتىنشا ءوزى دە سەكىرىپ كەتكەن. زارداپ شەككەندەر پودەزدىڭ كۇنقاعارىنا تۇسكەن.

الدىن الا مالىمەت بويىنشا، ەكى بالاسىن لاقتىرىپ، ارتىنان وزىنە قول سالعان ايەل پسيحيكالىق دەنساۋلىق بويىنشا ارنايى مەديسينالىق مەكەمەدە ەسەپتە تۇرعان.

قازىرگى ۋاقىتتا وقيعانىڭ جاي-جاپسارىن انىقتاۋ ءۇشىن تەرگەۋ جۇمىستارى جالعاسۋدا. وقيعا ورنىندا جەدەل-تەرگەۋ توبى جۇمىس ىستەپ جاتىر.