Pavlodarda anasy besinshi qabattan laqtyryp jibergen bir jarym jasar sábi aýrýhanada qaitys boldy. Dárigerler eki kún boiy onyń ómiri úshin arpalysqanymen, balany aman alyp qala almady, dep habarlaidy Dalanews.kz.
Qaiǵyly oqiǵa týraly Pavlodar oblysynyń bala quqyqtary jónindegi ýákili Sáýle Shákenova Instagram paraqshasynda habarlady.
«Ókinishke qarai, dárigerler qansha kúsh salǵanymen, búldirshinniń júregi toqtady», – dep jazdy ombýdsmen.
Pavlodar oblystyq balalar aýrýhanasy bul aqparatty rastap, balanyń 1 tamyz kúni keshkisin kóz jumǵanyn málimdedi.
«2024 jyly týǵan balanyń jaǵdaiy kúni boiy óte aýyr ári turaqsyz boldy. Keshke qarai jaǵdaiy nasharlai bastady. Saǵat 20:10-da júregi toqtap, saǵat 20:40-ta ólim tirkeldi», – dep habarlady dárigerler.
Osyǵan deiin habarlanǵandai, sábi aýrýhanaǵa klinikalyq ólim jaǵdaiynda túsken. Dárigerler onyń júrek soǵysyn qaita qalpyna keltirgenimen, ishki qan ketý sebebinen sol jaq búiregin alyp tastaýǵa májbúr bolǵan. Operatsiiadan keiin júregi taǵy da toqtap qalǵan, biraq meditsina mamandary ony qaita jandandyrǵan edi.
Besinshi qabattan qulaǵan sábi aýyr bas-mi jaraqatyn alyp, ishki aǵzalary zaqymdanǵan, sondai-aq úshinshi dárejeli jaraqattyq shok alǵan.
Jeti jasar balanyń jaǵdaiy jaqsaryp keledi
Sol oqiǵadan zardap shekken ekinshi bala – jeti jastaǵy uldyń jaǵdaiy ońalyp keledi. 31 shilde kúni ol aýrýhananyń travmatologiia bólimine aýystyryldy.
Oqiǵa qalai bolǵan edi?
Jantúrshigerlik oqiǵa 30 shilde kúni Pavlodar qalasynda boldy. 34 jastaǵy áiel ózimen birge eki balasyn kópqabatty úidiń besinshi qabatynan laqtyryp jiberip, artynsha ózi de sekirip ketken. Zardap shekkender podezdiń kúnqaǵaryna túsken.
Aldyn ala málimet boiynsha, eki balasyn laqtyryp, artynan ózine qol salǵan áiel psihikalyq densaýlyq boiynsha arnaiy meditsinalyq mekemede esepte turǵan.
Qazirgi ýaqytta oqiǵanyń jai-japsaryn anyqtaý úshin tergeý jumystary jalǵasýda. Oqiǵa ornynda jedel-tergeý toby jumys istep jatyr.
