اتىراۋدا الەۋمەتتىك جەلىدە جالعان لوتەرەيا مەن قايىرىمدىلىق ناۋقانىن ۇيىمداستىرىپ، الاياقتىق جاسادى دەپ ايىپتالعان بلوگەردىڭ سوتى باستالدى. ايىپتالۋشى ونداعان ادامدى الداپ، قوماقتى قارجى جيناپ العانىمەن، بەرگەن ۋادەسىنىڭ بىردە-بىرىن ورىنداماعان، دەپ حابارلايدى Dalanews.kz.
تەرگەۋ مالىمەتىنە سايكەس جەرگىلىكتى بلوگەر الەۋمەتتىك جەلى ارقىلى ءوزىنىڭ پاراقشاسىن بەلسەندى تۇردە جارنامالاپ، ءتۇرلى لوتەرەيالار مەن بايقاۋلار وتكىزگەن. ونىڭ ىشىندە باعالى اشەكەي بۇيىمدار، تۇرمىستىق تەحنيكا، "اقىلدى شۆابرا"، ءتاتتى تاعامدار سەكىلدى ءتۇرلى زاتتار ويناتىلعان. سونىمەن قاتار، ول كوپبالالى وتباسىلارعا كومەك رەتىندە قارجى جيناپ، كوپشىلىكتەن اقشا سۇراعان.
ۇيىمداستىرعان شارالارعا قاتىسۋ ءۇشىن قولدانۋشىلار بلوگەردىڭ جەكە شوتىنا اقشا اۋدارىپ وتىرعان. ءبىراق سالعان اقشالارى ءۇشىن ەشقانداي سىيلىق الماعان، قايىرىمدىلىق كومەگى دە جۇزەگە اسپاعان.
ءقازىر بۇل ءىس بويىنشا 68 ادام زارداپ شەگۋشى رەتىندە تانىلعان. سولاردىڭ ءبىرى 485 مىڭ تەڭگە اۋدارىپ، ۇلكەن ۇتىستان ۇمىتتەنگەنىن ايتىپ وتىر.
بلوگەردىڭ ءىسى قىلمىستىق كودەكستىڭ 190-بابىنىڭ 3-بولىگى ("اسا ءىرى كولەمدەگى الاياقتىق") بويىنشا قارالىپ جاتىر. كۇدىكتى باستاپقىدا قاماۋعا الىنىپ، كەيىن ءۇيقاماققا اۋىستىرىلعان. بۇل شەشىم الدانعان تۇرعىنداردىڭ نارازىلىعىن تۋعىزدى.
العاشقى سوت وتىرىسىندا بلوگەر ايەل ەسىنەن تانىپ قۇلاپ، جەدەل جاردەم شاقىرىلدى. ءبىراق سوتقا كەلگەندەردىڭ كوبى بۇل جاعدايعا كۇمانمەن قاراپ وتىر:
"سوت باستالا سالىپ ەسىنەن تانىپ قالۋى قالاي؟ وسىنشا ادامدى الداعان ول نەگە ۇيىندە وتىرادى؟ تەرگەۋ يزولياتورىندا وتىرسىن"، – دەيدى زارداپ شەككەندەر.
ايىپتالۋشىنىڭ تۋىستارى ونىڭ قاتتى كۇيزەلىسكە ءتۇسىپ، ىستەگەن ىسىنە وكىنەتىنىن ايتتى. ءقازىردىڭ وزىندە ول زارداپ شەككەندەرگە كەلتىرىلگەن شىعىننىڭ ءبىر بولىگىن ءوز ەركىمەن وتەي باستاعان.
بۇل جاعداي الەۋمەتتىك جەلىلەردە ۇلكەن تالقىعا ءتۇسىپ، جۇرتشىلىق جالعان قايىرىمدىلىقتى جەكە باس پايداسىنا پايدالاناتىندارعا جازانى قاتاڭداتۋدى تالاپ ەتىپ وتىر. سونداي-اق، كوپتەگەن ادام ايىپتالۋشىنىڭ پاراقشالارىن بۇعاتتاۋدى ۇسىنىپ، ونىڭ جاڭا قولدانۋشىلاردى الداپ سوعۋىنا جول بەرمەۋ كەرەك ەكەنىن ايتتى.
سوت ءىسى جالعاسىپ جاتىر. كەلەسى وتىرىس الداعى كۇندەرگە بەلگىلەندى.
