Atyraýda áleýmettik jelide jalǵan lotereia men qaiyrymdylyq naýqanyn uiymdastyryp, alaiaqtyq jasady dep aiyptalǵan blogerdiń soty bastaldy. Aiyptalýshy ondaǵan adamdy aldap, qomaqty qarjy jinap alǵanymen, bergen ýádesiniń birde-birin oryndamaǵan, dep habarlaidy Dalanews.kz.
Tergeý málimetine sáikes jergilikti bloger áleýmettik jeli arqyly óziniń paraqshasyn belsendi túrde jarnamalap, túrli lotereialar men baiqaýlar ótkizgen. Onyń ishinde baǵaly áshekei buiymdar, turmystyq tehnika, "aqyldy shvabra", tátti taǵamdar sekildi túrli zattar oinatylǵan. Sonymen qatar, ol kópbalaly otbasylarǵa kómek retinde qarjy jinap, kópshilikten aqsha suraǵan.
Uiymdastyrǵan sharalarǵa qatysý úshin qoldanýshylar blogerdiń jeke shotyna aqsha aýdaryp otyrǵan. Biraq salǵan aqshalary úshin eshqandai syilyq almaǵan, qaiyrymdylyq kómegi de júzege aspaǵan.
Qazir bul is boiynsha 68 adam zardap shegýshi retinde tanylǵan. Solardyń biri 485 myń teńge aýdaryp, úlken utystan úmittengenin aityp otyr.
Blogerdiń isi Qylmystyq kodekstiń 190-babynyń 3-bóligi ("Asa iri kólemdegi alaiaqtyq") boiynsha qaralyp jatyr. Kúdikti bastapqyda qamaýǵa alynyp, keiin úiqamaqqa aýystyrylǵan. Bul sheshim aldanǵan turǵyndardyń narazylyǵyn týǵyzdy.
Alǵashqy sot otyrysynda bloger áiel esinen tanyp qulap, jedel járdem shaqyryldy. Biraq sotqa kelgenderdiń kóbi bul jaǵdaiǵa kúmánmen qarap otyr:
"Sot bastala salyp esinen tanyp qalýy qalai? Osynsha adamdy aldaǵan ol nege úiinde otyrady? Tergeý izoliatorynda otyrsyn", – deidi zardap shekkender.
Aiyptalýshynyń týystary onyń qatty kúizeliske túsip, istegen isine ókinetinin aitty. Qazirdiń ózinde ol zardap shekkenderge keltirilgen shyǵynnyń bir bóligin óz erkimen ótei bastaǵan.
Bul jaǵdai áleýmettik jelilerde úlken talqyǵa túsip, jurtshylyq jalǵan qaiyrymdylyqty jeke bas paidasyna paidalanatyndarǵa jazany qatańdatýdy talap etip otyr. Sondai-aq, kóptegen adam aiyptalýshynyń paraqshalaryn buǵattaýdy usynyp, onyń jańa qoldanýshylardy aldap soǵýyna jol bermeý kerek ekenin aitty.
Sot isi jalǵasyp jatyr. Kelesi otyrys aldaǵy kúnderge belgilendi.
