قىتاي كٶرەرمەندەرٸنٸڭ نازارىن اۋدارىپ, تەنتٸ ەتكەن «ەرجٷرەك اسپان ساردارى» فيلمٸ قىتاي كينويندۋستريياسىنداعى بيىلعى جىلدىڭ تابىستى جوبالارىنىڭ بٸرٸ بولدى.
قىتايدا تۇراتىن قانداسىمىز مۇحتار تٸلەۋعازىۇلى «ەرجٷرەك اسپان ساردارى» فيلمٸندە بايرۇڭ تايپاسىنان شىققان باتىر رٶلٸن تاماشا سومداپ شىعادى. جٸبەك جولى بويىنداعى تاريحي وقيعانى بايان ەتكەن فيلم تارتىمدىلىعىمەن كٶرەرمەندٸ باۋراعان. وسىلايشا, بۇل تۋىندى قىتاي كينو تاريحىندا العاشقى كٷنگٸ بيلەتتەر ساتىلىمى بويىنشا رەكورد جاڭارتتى.
مۇحتار تٸلەۋعازىۇلى - قىتايدىڭ ٸلە قازاق اۆتونومييالىق وبلىسى, كٷنەس اۋدانىنىڭ تۋماسى. ول قىتايدىڭ ەڭ ەيگٸلٸ رەجيسسەرلەرٸنٸڭ تۋىندىلارىندا بەدەلدٸ رٶلدەردە ويناپ, كٶرەرمەننٸڭ كٶڭٸلٸنەن شىعىپ جٷر. قازٸرگٸ كٷنٸ قىتايدىڭ پاتشالارى مەن باتىرلارىنىڭ رٶلٸن سومداۋشىلار اراسىندا جوعارى سۇرانىسقا يە اكتەرلەردٸڭ بٸرٸ. نەگٸزٸنەن تاريحي فيلمدەرگە تٷسەدٸ. ونىڭ جۇلدىزىن جارقىراتقان تۋىندى - قىتايدىڭ لۋ چان ەسٸمدٸ بەلگٸلٸ رەجيسسەرٸنٸڭ «پاتشانىڭ قوناعاسى» فيلمٸ بولدى. بۇل تاريحي فيلمدە مۇحتار باتىس حان پاتشالىعىن قۇرۋعا ەڭبەك سٸڭٸرگەن اتاقتى ساردار فان كۋەيدٸڭ رٶلٸندە وينايدى. كٶرەرمەنگە ٶزٸنٸڭ باتىر كەلبەتٸمەن, ەرتٸستٸك تالانتىمەن ۇنايدى.
اكتەر 2013 جىلى «ياڭ گۋيفي» (ياڭ گۋيفي - قىتاي تاريحىنداعى ەڭ اتاقتى تٶرت ارۋدىڭ بٸرٸ بولعان) فيلمٸندە ان لۋشان سارداردىڭ رٶلٸن سومدايدى. وسى سەكٸلدٸ تاريحي فيلمدەردە جارقىراپ كٶرٸنگەن, تالانتتى قانداسىمىز سوڭعى تٶرت جىلدىڭ ٶزٸندە-اق جيىرمادان استام كينوعا تٷسكەن. مۇحتاردىڭ رٶل سومداۋ بارىسىنداعى وتتاي جانعان كٶز جانارى, باتىرلارعا تەن كەلبەتٸ, ات ٷستٸندەگٸ سايىسكەرلٸك ٶنەرٸ جۇرتقا ۇناعان. بۇل رٶلدەردٸ تاماشا سومداۋى ونىڭ قازاق اۋىلىندا تۋىپ, بالا كەزٸنەن باتىرلار جىرىن تىڭداپ, ات جالىندا ويناپ ٶسكەنٸنٸڭ ارقاسى.
