قاڭتاردىڭ ون ەكىنشى جۇلدىزىندا جەرلەسىمىز، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ماگەررام ماگەرراموۆ اۋدانعا كەلدى. ءماجىلىس دەپۋتاتىمەن بىرگە قازاقستان كوممۋنيستىك حالىق پارتياسى الماتى وبلىسى فيليالىنىڭ ءبىرىنشى حاتشىسى ساۋلە بيگاروۆا اۋدانعا ارنايى ات باسىن بۇردى. ونداعى ماقسات – قاراپايىم حالىقپەن كەزدەسىپ، وتكەن جىلى اتقارىلعان جۇمىس پەن «100 ناقتى قادام» ۇلت جوسپارىندا» ايقىندالعان مىندەتتەر قالاي جۇزەگە اسىرىلىپ جاتقانىن باعامداپ، قاراپايىم حالىقتىڭ حال-جاعدايىن ءبىلىپ، كەڭىنەن اڭگىمەلەسۋ.
جۇمىس ساپارىمەن كەلگەن حالىق قالاۋلىسى اۋدان اكىمىنىڭ ورىنباسارى ءاليا سادىقوۆانىڭ باستاۋىمەن اۋداندىق ەمحاناعا ارنايى باردى. ءماجىلىس دەپۋتاتى وسىدان ەكى جىل بۇرىن ىرگەتاسى قالانعان ەمحانانىڭ تىركەۋ ءبولىمى، رەنتگەن-دياگنوستيكالىق ءبولىمى، فليۋوروگرافيا ءبولىمى، ەرلەر جانە ايەلدەردى تەكسەرۋ ءبولىمى، الدىن الا تەكسەرۋ جانە سكرينينگتەن وتكىزۋ ءبولىمى قاتارلى بارلىق قۇرىلىمىمەن جەكە-جەكە تانىسىپ، مەديسينا سالاسىنداعى قىزمەتكەرلەردىڭ قاراپايىم حالىقتىڭ دەنساۋلىعى ءۇشىن ۇزدىكسىز ەڭبەك ەتۋلەرىنە تىلەكتەستىك ءبىلدىردى. ەمحانا باسشىلارىنىڭ كوز جانە رەنتگەنولوگ سالاسىندا ماماندار جەتىسپەيدى دەگەن ءوتىنىشىن تىڭداپ، بۇل ماسەلەنىڭ الداعى ۋاقىتتا شەشىمىن تاباتىنىنا سەنىم ءبىلدىردى.
حالىق قالاۋلىسىنىڭ ءىسساپارى تەمىرعالي يسابايەۆ اتىنداعى ورتا مەكتەپتە جالعاسىن تاپتى. ءبىلىم ورداسىنداعى ۇستازدارمەن ماڭىزدى كەزدەسۋ وتكىزىپ، ءۇش تىلدە ءبىلىم بەرۋ جۇيەسى تۋرالى كەڭىنەن اڭگىمەلەستى. ءاربىر وقۋشى قازاق، ورىس، اعىلشىن تىلىندە ەمىن-ەركىن سويلەپ، الەمدەگى وزىق ءبىلىمدى يگەرۋى كەرەك. بۇل ءبىر جىلدىڭ شارۋاسى ەمەس، ءبىراق ونى ۋاقىتتى جوعالتپاي باستاۋ قاجەت ەكەندىگىن ەرەكشە اتاپ ءوتتى. وقۋشىلاردىڭ نۇرلى بولاشاققا دەگەن تالپىنىسىن، بىلىمگە دەگەن قۇشتارلىعىن ۇزدىكسىز ارتتىرۋ ءۇشىن ۇستازداردى ۇزدىكسىز جۇمىس جاساۋعا شابىتتاندىردى. حالىق قالاۋلىسى ۇستازداردىڭ ايتقان ءوتىنىشىن مۇقيات تىڭدادى. تۋعان اۋىلىنا ارنايى كەلىپ، اۋداننىڭ تىنىس-تىرشىلىگىمەن تانىسقان ءماجىلىس دەپۋتاتى اۋداندا اتقارىلعان شارۋالارعا وڭ باعاسىن بەردى.
الاش ءتۇرسىنالى، الماتى وبلىسى
