تۋريزم جانە سپورت ءمينيسترى ەربول مىرزابوسىنوۆ 11-15 ماۋسىم كۇندەرى لوندوندا حالىقارالىق شاحمات فەدەراسياسى (فيدە) اياسىندا وتكەن بليس شاحماتتان كوماندالىق الەم چەمپيوناتىندا كۇمىس جۇلدەگە يە بولعان قازاقستان ۇلتتىق قۇراماسىنىڭ مۇشەلەرىمەن كەزدەستى،- دەپ حابارلايدى Dalanews.kz
جىلدام جانە بليس شاحماتتان ۇيىمداستىرىلعان كوماندالىق الەم چەمپيوناتىنا الەمنىڭ تۇكپىر-تۇكپىرىنەن 52 كوماندا قاتىستى. قازاقستان قۇراماسى ءدۇبىرلى دودادا ۇزدىك ناتيجە كورسەتىپ، كوماندالىق ەسەپتە كۇمىس جۇلدەنى يەلەندى. سونىمەن قاتار جەكەلەي سىندا 6 جۇلدە، ونىڭ ىشىندە 2 التىن مەدال جەڭىپ الدى.
كەزدەسۋ بارىسىندا مينيستر قازاقستان كومانداسىنىڭ جەتىستىگىن تاريحي وقيعا دەپ اتاپ، وتاندىق شاحمات مەكتەبىنىڭ جوعارى دەڭگەيدە دامىپ كەلە جاتقانىنىڭ ايقىن كورسەتكىشى ەكەنىن ايتتى.
«مەملەكەت باسشىسى بۇقارالىق سپورتتى دامىتۋ ماسەلەسىن ۇنەمى باستى نازاردا ۇستاپ كەلەدى. سىزدەردىڭ بۇل جەڭىستەرىڭىز – جەكە جەتىستىك ەمەس، بۇكىل قازاقستان حالقى ءۇشىن زور ماقتانىش. سىزدەر ەلىمىزدى الەمنىڭ ۇزدىك شاحمات ۇجىمدارىمەن تەرەزەسى تەڭ ەكەنىن دالەلدەدىڭىزدەر»، – دەدى ەربول مىرزابوسىنوۆ.
حالىقارالىق ارەنادا ەل نامىسىن ابىرويمەن قورعاپ، جوعارى سپورتتىق جەتىستىكتەرگە قول جەتكىزگەنى ءۇشىن گروسسمەيستەر، KazChess كومانداسىنىڭ مۇشەسى دارمەن سادۆاقاcوۆ، كوماندا كاپيتانى ءارى كۇمىس جۇلدەگەر گۇلميرا داۋلەتوۆا، سونداي-اق سپورتشىلار الديار انسات، ەلناز قالياحمەت جانە يسلام ايتەن العىس حاتتارمەن ماراپاتتالدى. ىشكى ەرەجەگە سايكەس، جوعارى ناتيجەلەر كورسەتكەن سپورتشىلاردى قولداۋ جانە ىنتالاندىرۋ ماقساتىندا ولاردىڭ ءارقايسىسىنا اقشالاي سەرتيفيكاتتار تابىستالدى. شاحمات سپورتىن دامىتۋعا قوسقان ۇلەسى ءۇشىن قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ «قۇرمەتتى سپورت قىزمەتكەرى» توسبەلگىسىمەن ماراپاتتالدى.
«كەز كەلگەن جەتىستىك – بۇل جاي عانا سپورتتىق ناتيجە نەمەسە جەكە جەڭىس ەمەس، مەملەكەتتىڭ جۇيەلى قولداۋىنىڭ ناقتى كورىنىسى ەكەنىن جاقسى تۇسىنەمىز. ءبىز بۇل قولداۋدى ءار كەزەڭدە سەزىنىپ كەلەمىز: بالالار شاحماتىن دامىتۋدان باستاپ، ەلىمىزدە ءىرى حالىقارالىق تۋرنيرلەردى ۇيىمداستىرۋعا دەيىن. بۇل بىزگە ەرەكشە سەرپىن بەرەدى، جىگەرلەندىرەدى ءارى الداعى بيىك ماقساتتاردى ايقىنداۋعا جول اشادى»، – دەدى تيمۋر تۋرلوۆ.
2025 جىلدىڭ العاشقى جارتىجىلدىعىندا وتاندىق شاحماتشىلار حالىقارالىق دەڭگەيدەگى جارىستاردا 81 مەدال جەڭىپ الدى. ونىڭ ىشىندە 34ء-ى – التىن، 21ء-ى – كۇمىس، 26-سى – قولا. بۇل – ەلىمىزدە شاحمات سپورتىن دامىتۋ ءىسى جۇيەلى جۇرگىزىلىپ جاتقانىن جانە ەلىمىزدىڭ باسەكەگە قابىلەتتىلىگىنىڭ ارتىپ كەلە جاتقانىن ايقىن كورىنىسى.
