اقمولا وبلىسىندا كاسىپكەر مەملەكەتتەن زاڭسىز قۋدالاۋدىڭ سالدارىنان كەلتىرىلگەن شىعىن ءۇشىن شامامەن 40 ميلليون تەڭگە ءوندىرىپ العان. الايدا ول بۇنىمەن توقتاماي، قوسىمشا 14 ميلليون تەڭگە وتەۋدى سۇرادى. الايدا اپەللياسيالىق سوت ونىڭ شاعىمىن قاناعاتتاندىرمادى، دەپ حابارلايدى Dalanews.kz. 

وقيعا 2019 جىلدىڭ كۇزىندە باستالعان. كوممەرسيالىق كومپانيا مەن شارۋا قوجالىعىنىڭ باسشىسى ۇيىمداسقان قىلمىستىق توپقا قاتىسى بار جانە بوتەن مۇلىكتى يەمدەندى دەگەن كۇدىكپەن تەرگەۋگە الىنعان.

2020 جىلدىڭ قىركۇيەگىنەن 2023 جىلدىڭ شىلدەسىنە دەيىن كاسىپكەر ءۇيقاماقتا بولدى. 2021 جىلى ونىڭ كومپانياسى بانكروت دەپ تانىلىپ، 2023 جىلى جەر پايدالانۋ قۇقىعىن ۇزارتۋعا ءوتىنىشى كەش بەرىلگەندىكتەن، ودان دا ايىرىلعان.

2023 جىلدىڭ سوڭىندا قىلمىستىق ءىس قۇرام بولماعاندىقتان توقتاتىلدى. وسىدان كەيىن كاسىپكەر پوليسيا مەن قارجى مينيسترلىگىنەن زاڭسىز قۋدالاۋدان كەلگەن ماتەريالدىق جانە مورالدىق شىعىندى وتەۋدى تالاپ ەتتى.

سوت زەينەتاقى قورىنان الىنعان دەرەكتەرگە سۇيەنە وتىرىپ، كاسىپكەردىڭ ءۇيقاماقتا بولعان كەزەڭدە 16،8 ميلليون تەڭگە ەڭبەكاقى جوعالتقانىن ەسەپتەپ شىعاردى. سونىمەن قاتار، مورالدىق زيان رەتىندە 9 ميلليون تەڭگە، ال ادۆوكات قىزمەتىنە جۇمسالعان شىعىن رەتىندە 14 ميلليون تەڭگە تولەۋدى مەملەكەتكە مىندەتتەدى.

الايدا كاسىپكەر بۇل شەشىممەن كەلىسپەي، اپەللياسيالىق شاعىم ءتۇسىردى. ول ادۆوكاتقا 28 ميلليون تەڭگە جۇمساعانىن ايتىپ، تولىق وتەم تالاپ ەتتى. ءبىراق وبلىستىق سوت باستاپقى سوت شەشىمىن وزگەرىسسىز قالدىردى.

"ءبىرىنشى ساتىداعى سوت زاڭسىز قۋدالاۋمەن ماتەريالدىق شىعىن اراسىنداعى سەبەپ-سالدارلىق بايلانىستى دۇرىس انىقتادى. ال ادۆوكاتتىق قىزمەت كورسەتۋ تۋرالى كەلىسىمشارتتا ەكى بولەك قىزمەت كورسەتىلەتىنى جازىلعان — بىرەۋى قىلمىستىق ءىس بويىنشا، ەكىنشىسى ازاماتتىق ىستەگى زاڭدى تۇلعانىڭ مۇددەسىن قورعاۋ. ادۆوكات تەك قىلمىستىق ءىس بويىنشا جۇمىس اتقارعان"، – دەپ ءتۇسىندىردى وبلىستىق سوت القاسى.