Aqmola oblysynda kásipker memleketten zańsyz qýdalaýdyń saldarynan keltirilgen shyǵyn úshin shamamen 40 million teńge óndirip alǵan. Alaida ol bunymen toqtamai, qosymsha 14 million teńge óteýdi surady. Alaida apelliatsiialyq sot onyń shaǵymyn qanaǵattandyrmady, dep habarlaidy Dalanews.kz.
Oqiǵa 2019 jyldyń kúzinde bastalǵan. Kommertsiialyq kompaniia men sharýa qojalyǵynyń basshysy uiymdasqan qylmystyq topqa qatysy bar jáne bóten múlikti iemdendi degen kúdikpen tergeýge alynǵan.
2020 jyldyń qyrkúieginen 2023 jyldyń shildesine deiin kásipker úiqamaqta boldy. 2021 jyly onyń kompaniiasy bankrot dep tanylyp, 2023 jyly jer paidalaný quqyǵyn uzartýǵa ótinishi kesh berilgendikten, odan da aiyrylǵan.
2023 jyldyń sońynda qylmystyq is quram bolmaǵandyqtan toqtatyldy. Osydan keiin kásipker politsiia men Qarjy ministrliginen zańsyz qýdalaýdan kelgen materialdyq jáne moraldyq shyǵyndy óteýdi talap etti.
Sot zeinetaqy qorynan alynǵan derekterge súiene otyryp, kásipkerdiń úiqamaqta bolǵan kezeńde 16,8 million teńge eńbekaqy joǵaltqanyn eseptep shyǵardy. Sonymen qatar, moraldyq ziian retinde 9 million teńge, al advokat qyzmetine jumsalǵan shyǵyn retinde 14 million teńge tóleýdi memleketke mindettedi.
Alaida kásipker bul sheshimmen kelispei, apelliatsiialyq shaǵym túsirdi. Ol advokatqa 28 million teńge jumsaǵanyn aityp, tolyq ótem talap etti. Biraq oblystyq sot bastapqy sot sheshimin ózgerissiz qaldyrdy.
"Birinshi satydaǵy sot zańsyz qýdalaýmen materialdyq shyǵyn arasyndaǵy sebep-saldarlyq bailanysty durys anyqtady. Al advokattyq qyzmet kórsetý týraly kelisimshartta eki bólek qyzmet kórsetiletini jazylǵan — bireýi qylmystyq is boiynsha, ekinshisi azamattyq istegi zańdy tulǵanyń múddesin qorǵaý. Advokat tek qylmystyq is boiynsha jumys atqarǵan", – dep túsindirdi oblystyq sot alqasy.
