الماتى قالاسى تۇركسىب اۋداندىق سوتىندا بيىل ناۋرىزدا اۋەجاي قىزمەتكەرىن كەپىلگە العان ماشراپبەك باراتوۆقا قاتىستى قىلمىستىق ءىس قارالۋدا. مەملەكەتتىك ايىپتاۋشى ايىپتالۋشىعا 10 جىل 6 اي باس بوستاندىعىنان ايىرۋ جازاسىن تاعايىنداۋدى سۇرادى، دەپ حابارلايدى Dalanews.kz.
سوتتاعى ءجارىسسوز كەزىندە پروكۋرور باراتوۆتى ورتاشا قاۋىپسىزدىك مەكەمەسىنە 10 جىل 6 ايعا قاماۋدى سۇرادى. ايىپتالۋشىنىڭ كىناسىن مويىنداۋى – جازانى جەڭىلدەتەتىن جاعداي رەتىندە ەسكەرىلدى. ال اۋىرلاتاتىن ءمان-جايلار انىقتالماعان. سونىمەن قاتار، پروكۋرور باراتوۆتىڭ 7 ناۋرىزدان باستاپ ۋاقىتشا ۇستاۋ يزولياتورىندا وتىرعان كۇندەرىن جالپى مەرزىمگە قوسۋدى سۇرادى.
باراتوۆتىڭ ادۆوكاتى ونىڭ اۋىر ومىرلىك جاعدايعا تاپ بولعانىن ايتىپ، ايىپتالۋشىنىڭ بۇل ارەكەتكە قاساقانا بارماعانىن جەتكىزدى. قورعاۋشىنىڭ سوزىنشە، ونىڭ قولىندا جارىلعىش زات بولماعان، ءقاۋىپ توندىرەتىن سوزدەردى ول ەموسيامەن ايتقان، ال جابىرلەنۋشىگە دەنە جاراقاتى كەلتىرىلمەگەن. باراتوۆ جاساعان ىسىنە وكىنگەن، كىناسىن مويىنداعان. قورعاۋ تارابى ونىڭ جاسى مەن جەڭىلدەتەتىن ءمان-جايلاردى ەسكەرىپ، ەڭ تومەنگى جازا تاعايىنداۋدى سۇرادى.
ەسكە سالايىق، زەينەتكەر ماشراپبەك باراتوۆتىڭ سوتى 2025 جىلعى 7 ساۋىردە باستالعان. ول كەزدە كولىك پروكۋراتۋراسىنىڭ وكىلى ايىپتالۋشى جينالعان دالەلدەرگە قارسىلىق بىلدىرمەگەندىكتەن، سوت وتىرىسىن قىسقارتىلعان تارتىپپەن وتكىزۋدى ۇسىنعان.
سوت بارىسىندا جابىرلەنۋشى اۋەجاي قىزمەتكەرى مەن ايىپتالۋشىنىڭ ءوزى جاۋاپ بەردى. باراتوۆ كونتۋزيا العانىن ايتىپ، قولىنا پىشاق الىپ، نە سەبەپتى كەپىلگە العانىن تۇسىندىرگەن.
الايدا كەيىن ايىپتالۋشى تاعىلعان ايىپتاردىڭ بىرىمەن كەلىسپەيتىنىن – ناقتى تالاپتار قويماعانىن ايتقان. وسىعان بايلانىستى ءىس قوسىمشا تەرگەۋگە قايتارىلعان بولاتىن.
2025 جىلدىڭ 30 ماۋسىمىندا باراتوۆقا قاتىستى قىلمىستىق ءىس الماتى قالاسى تۇركسىب اۋداندىق سوتىنا جولداندى. باس كولىك پروكۋراتۋراسى مالىمەتىنشە، وعان كەپىلگە ادام الۋ، بۇزاقىلىق جانە تەرروريزم اكتىسى تۋرالى جالعان حابار تاراتۋ باپتارى بويىنشا ايىپ تاعىلعان.
