Almaty qalasy Túrksib aýdandyq sotynda biyl naýryzda áýejai qyzmetkerin kepilge alǵan Mashrapbek Baratovqa qatysty qylmystyq is qaralýda. Memlekettik aiyptaýshy aiyptalýshyǵa 10 jyl 6 ai bas bostandyǵynan aiyrý jazasyn taǵaiyndaýdy surady, dep habarlaidy Dalanews.kz.
Sottaǵy jaryssóz kezinde prokýror Baratovty ortasha qaýipsizdik mekemesine 10 jyl 6 aiǵa qamaýdy surady. Aiyptalýshynyń kinásin moiyndaýy – jazany jeńildetetin jaǵdai retinde eskerildi. Al aýyrlatatyn mán-jailar anyqtalmaǵan. Sonymen qatar, prokýror Baratovtyń 7 naýryzdan bastap ýaqytsha ustaý izoliatorynda otyrǵan kúnderin jalpy merzimge qosýdy surady.
Baratovtyń advokaty onyń aýyr ómirlik jaǵdaiǵa tap bolǵanyn aityp, aiyptalýshynyń bul áreketke qasaqana barmaǵanyn jetkizdi. Qorǵaýshynyń sózinshe, onyń qolynda jarylǵysh zat bolmaǵan, qaýip tóndiretin sózderdi ol emotsiiamen aitqan, al jábirlenýshige dene jaraqaty keltirilmegen. Baratov jasaǵan isine ókingen, kinásin moiyndaǵan. Qorǵaý taraby onyń jasy men jeńildetetin mán-jailardy eskerip, eń tómengi jaza taǵaiyndaýdy surady.
Eske salaiyq, zeinetker Mashrapbek Baratovtyń soty 2025 jylǵy 7 sáýirde bastalǵan. Ol kezde kólik prokýratýrasynyń ókili aiyptalýshy jinalǵan dálelderge qarsylyq bildirmegendikten, sot otyrysyn qysqartylǵan tártippen ótkizýdi usynǵan.
Sot barysynda jábirlenýshi áýejai qyzmetkeri men aiyptalýshynyń ózi jaýap berdi. Baratov kontýziia alǵanyn aityp, qolyna pyshaq alyp, ne sebepti kepilge alǵanyn túsindirgen.
Alaida keiin aiyptalýshy taǵylǵan aiyptardyń birimen kelispeitinin – naqty talaptar qoimaǵanyn aitqan. Osyǵan bailanysty is qosymsha tergeýge qaitarylǵan bolatyn.
2025 jyldyń 30 maýsymynda Baratovqa qatysty qylmystyq is Almaty qalasy Túrksib aýdandyq sotyna joldandy. Bas kólik prokýratýrasy málimetinshe, oǵan kepilge adam alý, buzaqylyq jáne terrorizm aktisi týraly jalǵan habar taratý baptary boiynsha aiyp taǵylǵan.
