مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا جەر قاتىناستارىنا قاتىستى تۇيتكىلدەردى شەشۋ جونىندە ءبىرقاتار ناقتى تاپسىرما بەردى. پرەزيدەنتتىڭ ايتۋىنشا، اۋىل شارۋاشىلىعى جەرلەرىنىڭ بار يگىلىگى ەلدىڭ دامۋىنا جانە حالىقتىڭ تۇرمىسىن جاقسارتۋعا جۇمسالۋى كەرەك، دەپ حابارلايدى Dalanews.kz.
«مەن يگەرىلمەي بوس جاتقان جانە زاڭسىز الىنعان اۋىل شارۋاشىلىعى جەرلەرىن كەرى قايتارىپ، ونى قايتا ءبولۋ تۋرالى تاپسىرما بەردىم. جەر يەسىز قالماۋعا ءتيىس، جەردى تەك قانا ونىڭ ءقادىرىن بىلەتىن ازاماتتارعا بەرۋ كەرەك»، – دەدى توقايەۆ.
ونىڭ دەرەگىنشە، 2022 جىلدان بەرى جالپى اۋماعى 13،5 ميلليون گەكتاردان استام جەر مەملەكەت مەنشىگىنە قايتارىلعان. الايدا اكىمدىكتەر سونىڭ تەك 6 ميلليون گەكتارىن عانا جاڭا جەر يگەرۋشىلەرگە ءبولىپ ۇلگەرگەن.
«يەسىن تاپقان جەر ءوندىرىستىڭ وشاعىنا، ينۆەستيسيا كوزىنە، قايناعان ەڭبەكتىڭ ورتاسىنا اينالۋى قاجەت. بۇل – انىق نارسە»، – دەپ اتاپ ءوتتى پرەزيدەنت.
وسىعان بايلانىستى ءوڭىر اكىمدەرىنە قايتارىلعان جەردىڭ ءبارىن كەلەسى جىلدىڭ ورتاسىنا دەيىن تۇراقتى اينالىمعا ەنگىزۋ تاپسىرىلدى. بۇل شارا جايىلىم تاپشىلىعىن شەشۋگە دە مۇمكىندىك بەرەدى.
سونىمەن قاتار مەملەكەت باسشىسى جەر قاتىناستارىنا قاتىستى زاڭسىزدىق پەن قاعازباستىلىقتى جويۋدىڭ ماڭىزدىلىعىنا توقتالدى.
«اۋىل شارۋاشىلىعى جەرلەرىن ءبولۋ تاسىلدەرىن تۇبەگەيلى وزگەرتۋ كەرەك. جەردى بولۋگە قاتىستى شەشىم سيفرلىق فورماتتا، ەلەكتروندى كونكۋرستار ارقىلى قابىلدانۋعا ءتيىس. ۇكىمەت جىل سوڭىنا دەيىن زاڭناماعا ءتيىستى وزگەرتۋلەر ۇسىنۋى قاجەت»، – دەدى ول.
پرەزيدەنت بۇل سالادا سيفرلىق تەحنولوگيالاردى كەڭىنەن قولدانۋ قاجەتتىگىن دە ەرەكشە اتاپ ءوتتى. بۇگىندە كوسمومونيتورينگ پەن گەوتالداۋ جۇيەسى پايدالانىلماي جاتقان جەرلەردى انىقتاۋعا سەپتىگىن تيگىزۋدە. ەندى جاساندى ينتەللەكت ارقىلى جەردىڭ ساپاسىنا، ەگىننىڭ شىعىمىنا جانە داقىلداردىڭ جاي-كۇيىنە تەرەڭ تالداۋ جاسالاتىن بولادى.
مەملەكەت باسشىسى بۇل ءتاسىل ورمان شارۋاشىلىعىنا دا قاتىستى ەكەنىن ەسكە سالدى. ماسەلەن، سولتۇستىك قازاقستان وبلىسىندا 9 مىڭ گەكتار ورماننىڭ يەسىز جاتقانى انىقتالعان.
سونداي-اق پرەزيدەنت ءبىرىڭعاي سيفرلىق جەر كارتاسىن ازىرلەۋدى تاپسىردى. بۇل جۇيەگە كاداسترلىق مالىمەتتەرمەن بىرگە ينفراقۇرىلىم جانە جەر قويناۋىن پايدالانۋعا قاتىستى اقپارات تا ەنگىزىلمەك.
