2024 جىلى شەتەلدىك شاكىرتاقىعا يە بولىپ، ەلدەن جىراقتا ءبىلىم العان وتاندىق ستۋدەنتتەر بيىل تابىس دەكلاراسياسىن تاپسىرىپ، تابىس سالىعىن تولەۋگە ءماجبۇر بولادى، دەپ حابارلايدى Dalanews.kz.
قازاقستاندا قاتارداعى ازاماتتار جالپىعا بىردەي دەكلاراسيانى تاپسىرۋدان بوساتىلعانىنا قاراماستان، كەيبىرى بۇل مىندەتتى ورىنداپ، بيىلعى جىلعا سالىق تولەۋى ءتيىس. سونىڭ ىشىندە ءبىر جىل بۇرىن شەتەلدە تابىس تاپقاندار، ماسەلەن وعان شەتەلدىك شاكىرتاقىعا (شەتەلدىك كوزدەن قارجىلاندىرۋشى) يە بولعان ستۋدەنتتەر دە كىرەدى.
بۇل تۋرالى مەملەكەتتىك كىرىستەر كوميتەتىنىڭ (مكك) Instagram-داعى رەسمي پاراقشاسىندا ايتىلادى.
شەتەلدىك قارجى كوزىنەن قارجىلاندىرىلىپ، شاكىرتاقى الۋشى قازاقستاندىق ستۋدەنتتەر 270-نىسانداعى كىرىستەر مەن مۇلىك تۋرالى دەكلاراسيا باعانىندا شاكىرتاقى كولەمىن كورسەتۋى ءتيىس، سايكەسىنشە ونىڭ 10% مولشەرىندە جەكە تابىس سالىعى رەتىندە تولەۋى قاجەت بولادى.
"ءبىراق سالىق سالۋدان بوساتىلاتىن شاكىرتاقىلاردىڭ جەكە ساناتتارى بار. بۇل قازاقستاننىڭ ءبىلىم بەرۋ ۇيىمدارى ۇسىنعان، سونداي-اق "بولاشاق" سەكىلدى ارنايى مەملەكەتتىك باعدارلامالار اياسىندا تاعايىندالعان شاكىرتاقىلار بولىپ تابىلادى"، – دەيدى مكك سالىق ادىستەمەسى باسقارماسى باسشىسىنىڭ ورىنباسارى ايگۇل ابباسوۆا.
سونىمەن قاتار، ول كەلەسى جىلى بۇل مىندەت ءوز كۇشىن جوياتىنىن ەسكە سالادى. 2026 جىلعى 1 قاڭتاردان باستاپ قازاقستاندا جاڭا سالىق كودەكسى كۇشىنە ەنەدى، ونىڭ شەڭبەرىندە شەتەلدىك شاكىرتاقىلار مەن گرانتتاردى جەكە تابىس سالىعى سالىمىنان بوساتاتىن نورما قاراستىرىلعان.
وسى جاعىنان العاندا، 2024 جىلى شەتەلدە وقىعان، شەتەلدىك گرانتقا يە قازاقستاندىقتار ونى اعىمداعى جىلى دەكلاراسيالاپ، ءارى ودان 10 پايىزى كولەمىندە سالىق تولەۋگە ءماجبۇر بولادى، ال كەلەسى جىلى مۇنداي مىندەت ءوز كۇشىن جويادى.
