«دارىن» رەسپۋبليكالىق جالپى ءبىلىم بەرەتىن پاندەر بويىنشا وليمپيادانىڭ جەلىلىك كەزەڭىندە الماتى قالاسىنداعى حيميا-بيولوگيا باعىتىنداعى NIS كومانداسى وتىزدان استام جۇلدەلى ورىندارعا يە بولىپ بيىكتەن كورىندى. جالپى ءبىلىم دوداسىندا زياتكەرلىك مەكتەپتەردەن مىڭنان اسا وقۋشى ب ا ق سىناپ جاراتىلىستانۋ-ماتەماتيكالىق جانە قوعامدىق-گۋمانيتارلىق باعىتتار بويىنشا جوعارى بىلىمدەرىن كورسەتتى.

الماتى قالاسىنداعى زياتكەرلىك مەكتەپتىڭ وقۋشىلارى 5 التىن، 8 كۇمىس جانە 19 قولا مەدالگە قول جەتكىزدى.

جەڭىمپازدار قاتارىندا «TUYMAADA» حالىقارالىق مەندەلەيەۆ وليمپياداسىنىڭ ەكى دۇركىن جۇلدەگەرى ەڭلىك باقىتبەكوۆا بار. بيىلعى جىلعى مەكتەپ تۇلەگى حيميانى 7-سىنىپتان باستاپ تاڭدادى، جانە وليمپيادالارعا قاتىسىپ ءبىلىمىن جەتىلدىرىپ كەلەدى.

– حيميا ماعان وتە قاتتى ۇنايدى، كۇندەلىكتى ومىرمەن تىكە بايلانىستى، ۇڭىلسەڭىز وتە قىزىقتى دۇنيەلەردى ءوزىڭ ءۇشىن اشىپ تاڭ قالاسىز. ال وليمپياداعا قاتىسقان سايىن ءپاننىڭ جاڭا قىرىن اشاسىڭ. كەلەشەكتەدە ماماندىعىمدى حيميامەن بايلانىستىرامىن،- دەپ ءبولىستى ەڭلىك.

ەڭلىكتىڭ جەتەكشىسى ، «قازاقستاننىڭ ۇزدىك ۇستازى» اتاعىنىڭ يەگەرى شولپان ابىشيەۆا ەڭلىكتىڭ ەڭبەكقورلىعىن ەرەكشە ايتادى:

باقىتبەكوۆا ەڭلىك – ءارقاشان الدىنا ماقسات قوياتىن جان. ول ناقتى جوسپار قۇرۋدى بىلەدى جانە ونى ورىنداي وتىرىپ، ءوز ماقساتتارىنا تەز جانە ءتيىمدى قول جەتكىزەدى. ەڭلىك 2023 جىلى قازاقستان ءبىلىم وليمپياداسىندا ەكسپەرت بولىپ، باعالاۋعا قاتىستى. حيميادان بولەك ماتەماتيكا، گەوگرافيا، بيولوگيا پاندەرى بويىنشا كەشەندى وليمپياداعا قاتىسىپ 1-ورىن يەلەندى، عىلىمي جوبالاردىڭ اۆتورى. ءجۇز ەلۋدەن استام عىلىمي جۇمىستاردى زەرتتەپ، ماتەريالداردىڭ قاسيەتتەرىن زەرتتەۋ ادىستەرىن مەڭگەردى.

دارىندى وقۋشى نۋ پروفەسسورى حاييان فانمەن بىرلەسىپ سۋ وبەكتىلەرىنىڭ اۋىر مەتالدارمەن جانە بوياعىشتارمەن لاستانۋىن زەرتتەيتىن عىلىمي زەرتتەۋ جۇمىسىن جۇرگىزىپ، بانان قابىعىنان بەلسەندىرىلگەن كومىر الۋ ءادىسىن ازىرلەدى.

الماتى قالاسىنداعى زياتكەرلىك مەكتەپ حيميا-بيولوگيا باعىتى اتاعىن اقتاپ كەلەدى. وعان دالەل رەتىندە جىلدا حيميا-بيولوگيا سالاسىنداعى وقۋشىلاردىڭ جەتىستىكتەرىن كەلتىرۋگە بولادى. ءپان مۇعالىمدەرى دە بىلىمدەرىن شىڭداپ، بىلىكتىلىكتەرىن ارتتىرىۋدا. وسى وليمپيادادا حيميا پانىنەن جالپى 6 مەدال مەكتەپ قورجىنىن تولىقتىردى.

  ايتا كەتۋ كەرەك، قازىرگى تاڭدا نازاربايەۆ زياتكەرلىك مەكتەپتەرىنە ۇمىتكەرلەردىڭ قۇجاتتارى قابىلدانۋ ۇستىندە. 11 اقپانعا دەيىن قالاعان زياتكەرلىك مەكتەپكە بارىپ كونكۋرستىق ىرىكتەۋگە قاتىسۋ ءۇشىن ەلىمىزدىڭ 6-سىنىپ وقۋشىلارى قۇجاتتارىن تاپسىرا الادى.