2025 جىلى 15 قاڭتاردا مەملەكەت باسشىسى قاسىم-جومارت توقايەۆ ابۋ دابيگە جۇمىس ساپارى اياسىندا Masdar كومپانياسىنىڭ باس اتقارۋشى ديرەكتورى مۇحاممەد ال-راماحيمەن كەزدەسۋ وتكىزدى، دەپ جازادى Dalanews.kz.
اقوردا باسپا ءسوز قىزمەتىنىڭ حابارلاۋىنشا، مەملەكەت باسشىسى قازاقستان مەن Masdar كومپانياسى اراسىنداعى سەرىكتەستىك جاڭا ءارى ساپالى دەڭگەيگە كوتەرىلگەنىن اتاپ ءوتتى.
"پرەزيدەنت كومپانيا وكىلدەرىمەن بىرگە جامبىل وبلىسىندا قۋاتى 1 گۆت بولاتىن جەل ەلەكتر ستانسياسىنىڭ قۇرىلىسىن جۇزەگە اسىرۋعا قاتىستى كەلىسىمدەرگە قول جەتكىزىلگەنىن ايتتى. اتالعان ءىرى جوباعا 1،4 ميلليارد دوللار ينۆەستيسيا سالىنادى. ءوز كەزەگىندە مۇحاممەد ءال-راماحي كومپانيانىڭ قۇرىلىس جۇمىستارى بويىنشا جوسپارىمەن ءبولىستى. سونداي-اق جوبا اياسىندا جەل تۋربينالارىنىڭ وندىرىسىنە جەرگىلىكتى ونىمدەردى قولدانۋعا قىزىعۋشىلىق تانىتىپ وتىرعانىن جەتكىزدى".
قاسىم-جومارت توقايەۆ پەن مۇحاممەد ءال-راماحي Masdar كومپانياسىنىڭ قازاقستانداعى قىزمەت اياسىن كەڭەيتە وتىرىپ، جاڭارتىلاتىن ەنەرگەتيكا جانە سيفرلاندىرۋ سالالارىنداعى ماڭىزدى جوبالاردى ىسكە اسىرۋ جونىندە پىكىر الماستى.
سونىمەن قاتار كەزدەسۋگە Abu Dhabi National Oil Company (ADNOC) قايتا وڭدەۋ جانە وتكىزۋ جونىندەگى باس اتقارۋشى ديرەكتورى حاليد سالمين قاتىستى.
پرەزيدەنت ەلىمىزدىڭ ADNOC كومپانياسىمەن سەرىكتەستىكتى ودان ءارى دامىتۋعا باسا ءمان بەرەتىنىن اتاپ ءوتتى. حاليد سالمين ەكى ەلدىڭ ۇلتتىق مۇناي-گاز كومپانيالارى اراسىنداعى ءوزارا ىقپالداستىقتىڭ پەرسپەكتيۆالارىنا توقتالدى.
كەزدەسۋدە مۇناي-گازبەن قاتار گەولوگيالىق بارلاۋ ىسىندەگى بىرلەسكەن ينۆەستيسيالىق جوبالاردى جۇزەگە اسىرۋ ماسەلەلەرى تالقىلانىپ، سيفرلاندىرۋ جانە جاساندى ينتەللەكت سالالارىنداعى ىنتىماقتاستىققا ەرەكشە نازار اۋدارىلدى.
ايتا كەتسەك، مەملەكەت باسشىسى قاسىم-جومارت توقايەۆ 2025 جىلى 14 قاڭتاردا بىرىككەن اراب امىرلىكتەرىنە جۇمىس ساپارى اياسىندا "ابۋ ءدابيدىڭ ورنىقتى دامۋ اپتالىعى" سامميتىنە قاتىستى. مەملەكەت باسشىسى سامميتتە ءبىرىنشى بولىپ ءسوز سويلەدى. ءوز سوزىندە قاسىم-جومارت توقايەۆ ەلىمىزدەگى العاشقى اتوم ەلەكتر ستانسياسىنىڭ قۇرىلىسى وتاندىق ەنەرگەتيكا سالاسىن ورنىقتى دامىتۋ باعىتىنداعى ەلەۋلى قادام بولاتىنىن ايتتى.
