وليمپيادا چەمپيونى, قازاقستاندىق مەنەرلەپ سىرعاناۋشى ميحايل شايدوروۆ التى ايعا جۋىق ۋاقىت بويى جالاقى الماعانىن مەلٸمدەدٸ. سپورتشى بۇل جاعدايدى ٶزٸ بۇعان دەيٸن سپورت مينيسترلٸگٸن سىناعان پٸكٸرلەرٸمەن بايلانىستىرادى, دەپ حابارلايدى dalanews.kz.
شايدوروۆتىڭ ايتۋىنشا, ەكٸمدٸك پەن اقورداداعى سالتاناتتى قابىلداۋلاردان كەيٸن وعان جالاقى تٶلەۋ توقتاعان.
ەسكە سالساق, بۇعان دەيٸن مينيسترلٸك 2025 جىلى سپورتشىنىڭ قانشا كٶلەمدە جالاقى العانىن جارييالاعان ەدٸ. بۇل جاعداي ميحايل شايدوروۆتىڭ نارازىلىعىن تۋدىرعان. ونىڭ سٶزٸنشە, شەنەۋنٸكتەر وسىلايشا ٶزٸنٸڭ جەنە وتباسىنىڭ كٶپجىلدىق ەڭبەگٸن قۇنسىزداندىرىپ, وليمپيادا التىنىنداعى ٶز رٶلدەرٸن ەرەكشە كٶرسەتكٸسٸ كەلگەن.
سونىمەن بٸرگە سپورتشى 2023–2024 جىلدارى دايىندىققا كەتكەن نەگٸزگٸ شىعىنداردى ٶزٸ مەن دەمەۋشٸلەرٸ كٶتەرگەنٸن ايتتى. ونىڭ سٶزٸنشە, باعدارلامالاردى دايىنداۋ, كوستيۋم تٸكتٸرۋ جەنە باسقا دا شىعىنداردى جەكە ٶزٸ قارجىلاندىرعان.
— وسى مەسەلە تۋرالى اشىق ايتقاننان كەيٸن مەنٸ جازالاعىسى كەلگەندەي ەسەر قالدى. وليمپياداداعى جەڭٸسٸمە بەس اي بولدى, بٸراق ەلٸ كٷنگە دەيٸن جالاقى العان جوقپىن. بۇل ماعان تٷسٸنٸكسٸز. قازٸر كەلەسٸ ماۋسىمعا دايىندالۋىم كەرەك, الايدا ونى قالاي جٷزەگە اسىراتىنىمدى بٸلمەيمٸن. جاتتىعۋ جيىندارىنىڭ مەرزٸمٸ بەكٸتٸلگەن, جاڭا باعدارلامالاردى ەزٸرلەۋ ۋاقىتى دا جوسپارلانعان. باعدارلامالارعا كەتەتٸن شىعىنداردى ٶتەي مە دەپ بٸرنەشە رەت سۇرادىق. بٸراق بٸر جاۋاپتى ادام بٸر نەرسە ايتسا, ەكٸنشٸسٸ مٷلدە باسقا جاۋاپ بەرەدٸ, — دەدٸ ول جۋرناليست تيمۋر بالىمبەتوۆكە بەرگەن سۇحباتىندا.
سونداي-اق سپورتشى 1 اقپاننان باستاپ مەديتسينالىق باقىلاۋسىز قالعانىن جەتكٸزدٸ. ونىڭ ايتۋىنشا, كوماندا قۇرامىنداعى دەرٸگەر قىزمەتتەن كەتكەن.
ٶز كەزەگٸندە قر تۋريزم جەنە سپورت مينيسترلٸگٸنٸڭ سپورتتى دامىتۋ ديرەكتسيياسى سپورتشىلارعا تٶلەمدەر قولدانىستاعى كەلٸسٸمشارتتار مەن حالىقارالىق جارىستارعا دايىندىق شارتتارىنا سەيكەس جٷرگٸزٸلەتٸنٸن مەلٸمدەدٸ.
ۆەدومستۆونىڭ حابارلاۋىنشا, ميحايل شايدوروۆقا 2026 جىلدىڭ قاڭتار جەنە اقپان ايلارىنداعى جالاقىسى بۇرىن جاسالعان كەلٸسٸمشارت نەگٸزٸندە تولىق كٶلەمدە تٶلەنگەن.
ال 2026 جىلدىڭ ناۋرىزىنان باستاپ ميلانداعى وليمپييا ويىندارىندا التىن مەدال جەڭٸپ العاننان كەيٸن سپورتشىمەن جاڭا كەلٸسٸمشارت جاساۋ جوسپارلانعان. جاڭارتىلعان قۇجاتتا كەلەسٸ وليمپيادالىق تسيكل اياسىنداعى دايىندىق پەن قارجىلاندىرۋ شارتتارى قايتا قارالادى. قازٸرگٸ ۋاقىتتا كەلٸسٸمشارت تالاپتارى تاراپتار اراسىندا تالقىلانىپ جاتىر.
مينيسترلٸك مۇنداي تەجٸريبە جاڭا وليمپيادالىق تسيكلگە دايىندالاتىن بارلىق سپورتشىلارعا قولدانىلاتىنىن جەنە مەملەكەتتٸك قارجىلاندىرۋ جٷيەسٸندەگٸ قالىپتى رەسٸم ەكەنٸن اتاپ ٶتتٸ.
سونىمەن قاتار ۆەدومستۆو مەملەكەت ٶز مٸندەتتەمەلەرٸن تولىق ورىندايتىنىن مەلٸمدەدٸ. اتاپ ايتقاندا, وليمپييا ويىندارىنىڭ التىن جٷلدەسٸ ٷشٸن ميحايل شايدوروۆقا 250 مىڭ اقش دوللارى كٶلەمٸندە سىياقى بەرۋ, الماتىدان ٷش بٶلمەلٸ پەتەر تابىستاۋ جەنە زاڭناماعا سەيكەس ٶمٸر بويعى اي سايىنعى مەملەكەتتٸك تٶلەم تاعايىنداۋ قاراستىرىلعان.
