Olimpiada chempiony, qazaqstandyq mánerlep syrǵanaýshy Mihail Shaidorov alty aiǵa jýyq ýaqyt boiy jalaqy almaǵanyn málimdedi. Sportshy bul jaǵdaidy ózi buǵan deiin Sport ministrligin synaǵan pikirlerimen bailanystyrady, dep habarlaidy dalanews.kz.
Shaidorovtyń aitýynsha, ákimdik pen Aqordadaǵy saltanatty qabyldaýlardan keiin oǵan jalaqy tóleý toqtaǵan.
Eske salsaq, buǵan deiin ministrlik 2025 jyly sportshynyń qansha kólemde jalaqy alǵanyn jariialaǵan edi. Bul jaǵdai Mihail Shaidorovtyń narazylyǵyn týdyrǵan. Onyń sózinshe, sheneýnikter osylaisha óziniń jáne otbasynyń kópjyldyq eńbegin qunsyzdandyryp, Olimpiada altynyndaǵy óz rólderin erekshe kórsetkisi kelgen.
Sonymen birge sportshy 2023–2024 jyldary daiyndyqqa ketken negizgi shyǵyndardy ózi men demeýshileri kótergenin aitty. Onyń sózinshe, baǵdarlamalardy daiyndaý, kostiým tiktirý jáne basqa da shyǵyndardy jeke ózi qarjylandyrǵan.
— Osy másele týraly ashyq aitqannan keiin meni jazalaǵysy kelgendei áser qaldy. Olimpiadadaǵy jeńisime bes ai boldy, biraq áli kúnge deiin jalaqy alǵan joqpyn. Bul maǵan túsiniksiz. Qazir kelesi maýsymǵa daiyndalýym kerek, alaida ony qalai júzege asyratynymdy bilmeimin. Jattyǵý jiyndarynyń merzimi bekitilgen, jańa baǵdarlamalardy ázirleý ýaqyty da josparlanǵan. Baǵdarlamalarǵa ketetin shyǵyndardy ótei me dep birneshe ret suradyq. Biraq bir jaýapty adam bir nárse aitsa, ekinshisi múlde basqa jaýap beredi, — dedi ol jýrnalist Timýr Balymbetovke bergen suhbatynda.
Sondai-aq sportshy 1 aqpannan bastap meditsinalyq baqylaýsyz qalǵanyn jetkizdi. Onyń aitýynsha, komanda quramyndaǵy dáriger qyzmetten ketken.
Óz kezeginde QR Týrizm jáne sport ministrliginiń Sportty damytý direktsiiasy sportshylarǵa tólemder qoldanystaǵy kelisimsharttar men halyqaralyq jarystarǵa daiyndyq sharttaryna sáikes júrgiziletinin málimdedi.
Vedomstvonyń habarlaýynsha, Mihail Shaidorovqa 2026 jyldyń qańtar jáne aqpan ailaryndaǵy jalaqysy buryn jasalǵan kelisimshart negizinde tolyq kólemde tólengen.
Al 2026 jyldyń naýryzynan bastap Milandaǵy Olimpiia oiyndarynda altyn medal jeńip alǵannan keiin sportshymen jańa kelisimshart jasaý josparlanǵan. Jańartylǵan qujatta kelesi olimpiadalyq tsikl aiasyndaǵy daiyndyq pen qarjylandyrý sharttary qaita qaralady. Qazirgi ýaqytta kelisimshart talaptary taraptar arasynda talqylanyp jatyr.
Ministrlik mundai tájiribe jańa olimpiadalyq tsiklge daiyndalatyn barlyq sportshylarǵa qoldanylatynyn jáne memlekettik qarjylandyrý júiesindegi qalypty rásim ekenin atap ótti.
Sonymen qatar vedomstvo memleket óz mindettemelerin tolyq oryndaitynyn málimdedi. Atap aitqanda, Olimpiia oiyndarynyń altyn júldesi úshin Mihail Shaidorovqa 250 myń AQSh dollary kóleminde syiaqy berý, Almatydan úsh bólmeli páter tabystaý jáne zańnamaǵa sáikes ómir boiǵy ai saiynǵy memlekettik tólem taǵaiyndaý qarastyrylǵan.
