استانادا ينۆەستور شەنەۋنىكتەردىڭ جىبەرگەن قاتەلىگىنە بايلانىستى وقۋ ورداسىن اشۋعا رۇقسات الا الماعان. بۇل تۋرالى قالالىق پروكۋراتۋرا مالىمدەدى، دەپ حابارلايدى Dalanews.kz.
2020 جىلى قالادا مەكتەپ پەن بالاباقشا قۇرىلىسى باستالعان بولاتىن. پروكۋراتۋرانىڭ مالىمەتىنشە، بۇل جوبانىڭ قۇنى 1،3 ميلليارد تەڭگە بولىپ، ونىڭ ارقاسىندا 90 ادامدى جۇمىسپەن قامتۋعا مۇمكىندىك تۋعان.
“قۇرىلىس اياقتالعان سوڭ ۋاكىلەتتى ورگان ينۆەستورعا نىساندى پايدالانۋعا بەرۋ ءۇشىن قاجەتتى قۇجاتتاردى بەرۋدەن باس تارتقان. شەشىم جوبانىڭ قاتە تۇردە تەحنيكالىق كۇردەلى نىسان ساناتىنا جاتقىزىلىپ، مەملەكەتتىك ساراپتامادان ءوتۋدى تالاپ ەتۋىنە بايلانىستى قابىلدانعان”، – دەلىنگەن حابارلامادا.
پروكۋرورلاردىڭ ارالاسۋىنان كەيىن ينۆەستور ءتيىستى رۇقسات الىپ، مەكتەپ پەن بالاباقشا پايدالانۋعا بەرىلدى.
قاتەلىك جىبەرگەندەر جاۋاپقا تارتىلدى، ءبىراق ولاردىڭ قانداي جاۋاپكەرشىلىككە تارتىلعانى پروكۋراتۋرادا ناقتىلانبادى.
