الەۋمەتتىك جەلىدە قىتايدىڭ Changan كولىكتەرىنە قاتىستى سىن كوبەيدى، دەپ حابارلايدى Dalanews.kz.
جەلى قولدانۋشىلارىنىڭ ءبىرى TikTok-تا وسىنداي ۆيدەو جاريالادى. ۆيدەو اۆتورىنىڭ ايتۋىنشا، Changan CS55 كولىگىنىڭ قوزعالتقىشى وتالماي قالعان.
"ءبىرىنشى، ەكىنشى سيليندردە كومپرەسسيا بار، تورتىنىشسىندە كومپرەسسيا جوق"، - دەيدى ۆيدەوداعى ەر ادام.
"نازىك كولىكتەر ەكەن وزدەرى"، "تاعى ءبىراز شىداڭدار، تالاي كونسەرت كورەمىز"، "ول بەنزيننەن ەمەس، كولىكتىڭ ءوزى ارزان، زاۋىت وعان ارزان "سۆەچا" سالىپ تۇر"، "بەس جىلدا قوقىسقا اينالادى"، - دەگەن جەلى قولدانۋشىلارى ۆيدەوعا.
وسىلايشا جۇڭگو كولىكتەرىنىڭ قازاقستانداعى داۋى ەندى ءورشي باستاعانداي. تۇتىنۋشىلار قۇقىعىن قورعاۋ كوميتەتىنىڭ دەرەگىنشە، 2024 جىلى ەلىمىزدە كولىككە قاتىستى تىركەلگەن 144 شاعىمنىڭ 57ء-سى، ياعني ءاربىر ونىنشىسى ءدال وسى جۇڭگو كولىكتەرىنە بايلانىستى بولعان.
بۇل - نارىققا جاڭا سەرپىنمەن كىرىپ، قولجەتىمدى باعاسىمەن تۇتىنۋشىنى وزىنە تارتىپ جۇرگەن جۇڭگو كولىكتەرىنىڭ "يميدجىنە" ايتارلىقتاي سىزات تۇسكەنىنىڭ بەلگىسى.
تۇتىنۋشىلار نەگىزىنەن قوزعالتقىشتىڭ اقاۋى مەن بەرىلىس قورابىنىڭ (كوروبكىنىڭ) ءجيى ىستەن شىعاتىنىن ايتىپ، شاعىمدانعان.
بۇعان قوسا، ەلەكترونيكا، سالقىنداتۋ جۇيەسىنىڭ ولقىلىقتارى، ءتىپتى وندىرۋشىلەر مالىمدەگەن سيپاتتامالاردىڭ شىنايى كورسەتكىشتەرگە ساي بولماۋى دا ساتىپ الۋشىلاردىڭ كوڭىلىن سۋىتقان. كەيبىر كليەنتتەر كولىكتى ساتۋشىعا قايتارىپ بەرۋگە دەيىن بارعان.
مەملەكەتتىك ورگاندار ارالاسقاننان كەيىن عانا اۆتوسالوندار كولىكتى جوندەپ بەرۋگە نەمەسە اقاۋلى بولشەكتەردى تەگىن اۋىستىرۋعا كەلىسىپتى.
ماسەلەن، اقمولا وبلىسىندا تۇتىنۋشىلار كولىكتىڭ قوزعالتقىشىن اۋىستىرۋدى تالاپ ەتىپ، شاعىم كولەمى 10 ميلليون تەڭگەگە جۋىقتاعان. ال اقتوبە وبلىسىندا سوت شەشىمىمەن اۆتوسالوندار تۇتىنۋشىلارعا مورالدىق شىعىندى قوسا العاندا، 16 ميلليون تەڭگەدەن استام قارجى تولەگەن. اتىراۋ وبلىسىندا تۇتىنۋشىعا 7 ميلليون تەڭگەدەن استام قاراجات قايتارىلعان.
"قوزعالتقىش پەن بەرىلىس قورابى سەكىلدى ەڭ ماڭىزدى بولشەكتەردە ءجيى كەزدەسەتىن اقاۋ قىتايدىڭ ارزان كولىگىن قىمبات "باس اۋرۋعا" اينالدىرۋى ابدەن مۇمكىن. ەگەر تاۋەكەلگە بەل بۋساڭىز، الدىن الا كەپىلدىكتىڭ شارتتارىن، ديلەرلەردىڭ قىزمەت ساپاسىن مۇقيات تەكسەرىپ العان ءجون. ال سەنىمدىلىك پەن قاۋىپسىزدىكتى ءبىرىنشى ورىنعا قوياتىن ادامعا ازىرشە باسقا برەندتەرگە نازار اۋدارۋ دۇرىسىراق بولاتىن سياقتى"، - دەيدى ساراپشىلار بۇل تۋراسىندا.
ايتا كەتەيىك، Changan Automobile Group - كولىك شىعاراتىن جۇڭگو كومپانياسى. ول ەلدەگى ەڭ ءىرى 20 ءوندىرۋشىنىڭ قاتارىنا كىرەدى. ونىڭ شتاب-پاتەرى چۋنسين قالاسىندا ورنالاسقان. 2021 جىلى ساتىلعان كولىك سانى بويىنشا (2،301 ملن.) كومپانيا قىتايدا 4ء-شى ورىنعا يە بولدى.
