تەرروريستىك ايماقتاردان ورالعان ازاماتتارعا كومەك كورسەتكىسى كەلەتىندەرگە 12 ميلليون تەڭگەگە دەيىن گرانت بەرىلەدى. ازاماتتىق باستامالاردى قولداۋ ورتالىعى مەملەكەتتىك گرانتتارعا ءوتىنىم قابىلداۋدى باستادى، دەپ حابارلايدى Dalanews.kz.
بۇل قارجى تەرروريستىك بەلسەندىلىك وشاقتارىنان ورالعان ازاماتتارعا، سونداي-اق قازا تاپقان نەمەسە ءىز-تۇزسىز جوعالعان قازاقستاندىقتاردىڭ تۋىستارىنا قۇقىقتىق جانە الەۋمەتتىك قولداۋ كورسەتۋگە باعىتتالادى.
ۆەدومستۆو وكىلدەرىنىڭ ايتۋىنشا، رەپاتريانتتار مەن ولاردىڭ وتباسى مۇشەلەرى مەملەكەت كەپىلدىك بەرگەن الەۋمەتتىك قىزمەتتەر مەن جاردەماقىلاردى الۋ كەزىندە كوپتەگەن قيىندىققا تاپ بولۋدا. ۋاقىتىلى شەشىلمەگەن الەۋمەتتىك جانە قۇقىقتىق ماسەلەلەر – راديكالدى يدەولوگياعا قايتا بوي الدىرۋ ءقاۋپىن ارتتىرادى.
“گرانتتىڭ ماقساتى – قۇجات راسىمدەۋگە كومەكتەسۋ، زاڭگەرلىك كەڭەس بەرۋ جانە الەۋمەتتىك تولەمدەرگە قول جەتكىزۋ ءۇشىن مەملەكەتتىك قىزمەتتەردى قالپىنا كەلتىرۋگە جاردەمدەسۋ”، – دەدى مينيسترلىكتەگىلەر.
گرانت العان جوبالار 2025 جىلدىڭ تامىزىنان جەلتوقسانىنا دەيىن استانا، الماتى قالالارىندا، اتىراۋ جانە باتىس قازاقستان وبلىستارىندا جۇزەگە اسادى. ءبىر قىسقا مەرزىمدى گرانتتىڭ كولەمى – 11،8 ميلليون تەڭگە.
ءوتىنىم قابىلداۋ مەرزىمى، قاتىسۋشىلارعا قويىلاتىن تالاپتار مەن قۇجاتتار ءتىزىمى تۋرالى تولىق اقپارات مەملەكەتتىك گرانتتاردىڭ ءبىرىڭعاي وپەراتورىنىڭ رەسمي رەسۋرستارىندا جاريالانعان.
