قورعانىس ءمينيسترىنىڭ ءبىرىنشى ورىنباسارى – باس شتاب باستىعى سۇلتان قامالەتدينوۆ اسكەرگە شاقىرىلۋشىلاردى كوشەدەن “ۇستاۋ” جاعدايلارىنا قاتىستى پىكىر ءبىلدىردى، دەپ حابارلايدى Dalanews.kz.
جۋرناليستەر اسكەري قىزمەتكەرلەردىڭ كەيدە جاستاردى كوشەدە كۇشتەپ اكەتىپ جاتقانىن ايتىپ، مۇنداي ارەكەتتەردىڭ زاڭدىلىعىن سۇرادى.
“وكىنىشكە قاراي، ونداي فاكتىلەر بار. بۇل، ارينە، جول بەرۋگە بولمايتىن نارسە. ءبىراق ايتا كەتەتىن جايت – پرەزيدەنت زاڭ مەن ءتارتىپتى ايقىنداپ بەردى. كونستيتۋسيانىڭ 36-بابىندا بۇل ەرىكتى تاڭداۋ ەمەس، ازاماتتىڭ مىندەتى جانە بورىشى دەپ جازىلعان. ياعني، ول ونى ورىنداۋعا ءتيىس. ال ەگەر ورىنداماسا، زاڭ سول ازاماتقا دا قولدانىلادى”، – دەپ جاۋاپ بەردى سۇلتان قامالەتدينوۆ.
سونداي-اق ول ءوزىنىڭ قىزمەت اتقارۋ كەزەڭىندە اسكەرگە شاقىرىلۋشىلاردى كۇشتەپ اكەتكەندەرگە قاتىستى ەشكىمنىڭ جاۋاپكەرشىلىككە تارتىلماعانىن اتاپ ءوتتى. ءبىراق ەگەر ازاماتتار ءوز قۇقىقتارىنىڭ بۇزىلعانىن سەزىنسە، سوتقا شاعىمدانۋعا قۇقىلى ەكەنىن ايتتى.
ەسكە سالايىق، بۇعان دەيىن مەملەكەت باسشىسى قاسىم-جومارت توقايەۆتىڭ جارلىعى بويىنشا 2025 جىلى 42 098 ازاماتتى اسكەري قىزمەتكە شاقىرۋ تۋرالى شەشىم قابىلدانعان ەدى.
“وبلىستاردىڭ، استانا، الماتى جانە شىمكەنت قالالارىنىڭ اكىمدەرىنە زاڭنامادا بەلگىلەنگەن تارتىپپەن:
1. شاقىرۋ كوميسسيالارىنىڭ جۇمىسىن ۇيىمداستىرىپ، 2025 جىلدىڭ ناۋرىز-ماۋسىم جانە قىركۇيەك-جەلتوقسان ايلارىندا 18-27 جاس ارالىعىنداعى، اسكەرگە شاقىرۋدان بوساتۋعا نەمەسە كەيىنگە قالدىرۋعا قۇقىعى جوق ەر ازاماتتاردى مەرزىمدى اسكەري قىزمەتكە شاقىرۋدى قامتاماسىز ەتۋ؛
2. قازاقستان رەسپۋبليكاسىنىڭ زاڭناماسىنا سايكەس، اسكەري شاقىرۋ پۋنكتتەرىن مەديسينالىق قامتاماسىز ەتۋدى ۇيىمداستىرۋ جۇكتەلسىن”، – دەلىنگەن ۇكىمەتتىڭ جارلىقتى ىسكە اسىرۋ جونىندەگى قاۋلىسىندا.
ىشكى ىستەر مينيسترلىگىنە اسكەرگە شاقىرىلۋشىلاردى جيناۋ جانە اسكەرگە جىبەرۋ ورىندارىندا قۇقىقتىق ءتارتىپتى قامتاماسىز ەتۋ ماقساتىندا پوليسيا قىزمەتكەرلەرىنىڭ كۇشەيتىلگەن كەزەكشىلىگىن ۇيىمداستىرۋ تاپسىرىلدى.
سونىمەن قاتار قازاقستان رەسپۋبليكاسى كولىك مينيسترلىگىنە اسكەري قىزمەتىن وتەپ بولعان ازاماتتاردى زاپاسقا شىعارۋ جانە مەرزىمدى اسكەري قىزمەتكە شاقىرىلعانداردى قازاقستان رەسپۋبليكاسىنىڭ قارۋلى كۇشتەرى، ىشكى ىستەر مينيسترلىگى، توتەنشە جاعدايلار مينيسترلىگى، ۇلتتىق قاۋىپسىزدىك كوميتەتى، مەملەكەتتىك كۇزەت قىزمەتى بولىمشەلەرىنە تاسىمالداۋدى قامتاماسىز ەتۋ جۇكتەلدى.
قورعانىس، ىشكى ىستەر، توتەنشە جاعدايلار مينيسترلىكتەرىنە اسكەرگە شاقىرىلعاندار مەن زاپاسقا شىعارىلعان ساربازداردى تاسىمالداۋعا كەتكەن شىعىنداردى رەسپۋبليكالىق بيۋدجەتتەن بولىنگەن قاراجات شەڭبەرىندە تاسىمالداۋ قىزمەتىن كورسەتەتىن ۇيىمدارعا تىكەلەي وتەۋ مىندەتتەلدى.
