ازەربايجاندىق اسكەري قىزمەتشىلەر تۇركى مەملەكەتتەرى ۇيىمى اياسىندا قازاق تىلىندە ءبىلىم العىسى كەلەدى. بۇل تۋرالى قازاقستان رەسپۋبليكاسى ۇلتتىق قورعانىس ۋنيۆەرسيتەتىنىڭ باستىعى اسقار مۇستابەكوۆ مالىمدەدى، دەپ حابارلايدى Dalanews.kz.
"ازەربايجاندا ولار ازەربايجان، تۇرىك نەمەسە اعىلشىن تىلدەرىندە وقيدى. وسىعان بايلانىستى ولار ءبىزدىڭ ۋنيۆەرسيتەتتە قازاق تىلىندە وقۋ كۋرستارىنان ءوتۋدى قالادى"، -دەدى اسقار مۇستابەكوۆ.
ونىڭ ايتۋىنشا، 1 قىركۇيەكتەن باستاپ ۋنيۆەرسيتەتتە قازاق ءتىلى كۋرستارى اشىلادى.
"الدىمەن ولار قازاق ءتىلىن وقيدى. كۋرستار 9 ايعا سوزىلادى"، - دەدى ول.
مۇستابەكوۆ وقۋ باعدارلامالارى ۋنيۆەرسيتەتتەگى ورىس ءتىلى كۋرستارى ۇلگىسىندە قۇرىلاتىنىن ايتتى.
"جۇڭگو، فرانسيا جانە ءۇندىستان وفيسەرلەرى ۋنيۆەرسيتەتتە ورىس ءتىلىن ۇيرەنىپ، سودان كەيىن نەگىزگى ءبىلىم الادى"، — دەدى ول.
ايتا كەتەيىك، ءقازىر قازاقستاننىڭ ۇلتتىق قورعانىس ۋنيۆەرسيتەتىندە ۇقشۇ ەلدەرىنىڭ اسكەري قىزمەتشىلەرى ءبىلىم الىپ جاتىر. وندا اسكەري پاندەر ورىس تىلىندە وقىتىلادى.
