قازاقستاندىقتارعا دا، باسقا شەتەل ازاماتتارىنا دا رەسەي شەكاراسىنان ءوتۋ كەزىندە جاڭا شەكتەۋلەر قويىلادى. ەندى جول قوزعالىسى ەرەجەسىن (جقە) جۇيەلى تۇردە بۇزۋ ەلگە ءۇش جىلعا دەيىن كىرگىزبەۋگە نەگىز بولا الادى، دەپ حابارلايدى Dalanews.kz.

رف-نىڭ «رەسەي فەدەراسياسىنان شىعۋ جانە رەسەي فەدەراسياسىنا كىرۋ ءتارتىبى تۋرالى» فەدەرالدىق زاڭى بويىنشا، ەگەر شەتەل ازاماتى ءۇش جىل ىشىندە ەكى رەت نەمەسە ودان دا كوپ اكىمشىلىك جاۋاپكەرشىلىككە تارتىلسا، وعان شەكارادان وتۋگە تىيىم سالىنۋى مۇمكىن. بۇل تەك اۋىر قۇقىقبۇزۋشىلىقتارعا عانا ەمەس، سالىستىرمالى تۇردە ۇساق جول ەرەجەسى بۇزۋشىلىقتارىنا دا قاتىستى.

«ريا نوۆوستي»ء-نىڭ مالىمەتىنشە، شەتەلدىك بارلىق ايىپپۇلدارىن تولەگەن كۇننىڭ وزىندە رەسەيگە كىرۋىنە تىيىم سالىنۋى ىقتيمال.

ءۇش جىلعا كىرۋگە تىيىم سالۋعا نەگىز بولاتىن جاعدايلار:

جولدى بەلگىلەنبەگەن جەردەن كەسىپ ءوتۋ نەمەسە جاياۋ جۇرگىنشى تاراپىنان وزگە دە ەرەجە بۇزۋشىلىقتار؛

قاۋىپسىزدىك بەلبەۋىن تاقپاۋ نەمەسە موتوسيكل شلەمىنىڭ بولماۋى؛

ماس كۇيىن انىقتاۋعا ارنالعان مەديسينالىق تەكسەرۋدەن باس تارتۋ؛

جارامدى تەحنيكالىق دياگنوستيكالىق كارتاسىز كولىك باسقارۋ؛

جاياۋ جۇرگىنشىلەرگە جول بەرمەۋ؛

مەملەكەتتىك نومىرلەردى دۇرىس ورناتپاۋ؛

جول بەلگىلەرى مەن سىزىقتارىن ەلەمەۋ.

قازاقستاندىقتارعا ەسكەرتۋ

رەسەيگە ءجيى باراتىن قازاقستاندىقتارعا «ۇساق» ەرەجە بۇزۋشىلىقتارعا دا مۇقيات بولۋ قاجەت. ويتكەنى مۇنداي فاكتىلەر كوشى-قون ورگاندارىنىڭ شەشىم قابىلداۋ كەزىندە ەسكەرىلەدى.