جەتىسۋ وبلىسىنىڭ ەسكەلدى اۋدانىندا سوڭعى ءۇش جىلدا پايدالانباي جاتقان 30 مىڭ گەكتار جەر مەملەكەت مەنشىگىنە قايتارىلدى، سونىڭ 26 مىڭ گا - جايىلىم، 3،7 مىڭ گا - ەگىستىك، 300 گا - شابىندىق. بۇگىنگى كۇنگە قايتارىلعان جەرلەردىڭ 21 مىڭ گەكتارى نەمەسە 69% اينالىمعا تارتىلدى. ونىڭ 5 مىڭ گەكتارى كونكۋرس ارقىلى، 16 مىڭ گەكتارى اۋداننىڭ بارلىق اۋىلدىق وكرۋگتەرىنە قوعامدىق جايىلىم رەتىندە بەرىلدى. بۇل جايىندا بۇگىن اۋدان تۇرعىندارىمەن كەزدەسۋى كەزىندە وبلىس اكىمى بەيبىت يسابايەۆ ايتتى،- دەپ حابارلايدى Dalanews.kz جەتىسۋ وبلىسى اكىمدىگىنىڭ باسپا ءسوز قىزمەتىنە سلتەمە جاساپ.
ءوڭىر باسشىسىنىڭ ايتۋىنشا، بيىل اۋدان قورىندا تۇرعان جەرلەرگە 13 ۋچاسكەنى قامتيتىن 2 كونكۋرس وتكىزىلىپ، 1800 گەكتار جەر تابىستالعان، ونىڭ ىشىندە سۋارمالى جانە ءتالىمى ەگىستىكتەر مەن جايىلىمدىق جەرلەر بار. قازان ايىندا 1 مىڭ گەكتارعا تاعى ءبىر كونكۋرس وتكىزىلەدى.
بۇل رەتتە پايدالانىلماي جاتقان جەرلەردى قايتارۋدىڭ جىلدىق جوسپارى 7000 گەكتار بولسا، ونىڭ تەك 3700 گەكتارى عانا قايتارىلعان. وسىعان بايلانىستى بۇل باعىتتاعى جۇمىستى كۇشەيتۋدى تاپسىرعان وبلىس اكىمى ەسكەلدى اۋدانىنىڭ اۋىل شارۋاشىلىعىن دامىتۋعا قولايلى اگرارلىق باعىتتاعى ايماق ەكەنىن ەستەن شىعارماۋ كەرەكتىگىن ايتتى.
- اۋىل شارۋاشىلىعى سالاسىندا بيىلعى جىلدىڭ 7 ايىندا 17،2 ملرد. تەڭگەنىڭ ءونىمى ءوندىرىلدى، ونىڭ ىشىندە مال شارۋاشىلىعى ءونىمى 10 ملرد. تەڭگەنى قۇراپ، 6%-عا ارتتى، وسىمدىك شارۋاشىلىعىنىڭ جالپى ءونىمى 7،4 ملرد. تەڭگەنى قۇراپ، 2 ەسەگە ءوستى. اۋدانداعى ەگىس القاپتارى 53،4 مىڭ گەكتار. بۇگىنگى كۇنگە 26 مىڭ گەكتار ماساقتى ءداندى داقىلدار ورىلىپ، 42 مىڭ توننا استىق باستىرىلدى، ورتاشا گەكتار ونىمدىلىگى 17 سەنتنەردى قۇرادى. مەملەكەت تاراپىنان بۇل باعىتتا كومەك كورسەتىلىپ، سۋبسيديالار، جەڭىلدەتىلگەن نەسيەلەر بەرىلۋدە، اۋدان ديقاندارى وسى مۇكىندىكتەردى پايدالانىپ، ۇكىمەتتىڭ قولداۋىمەن 56 بىرلىك اۋىل شارۋاشىلىعى تەحنيكاسىن ساتىپ الدى. ءبىزدىڭ ماقساتىمىز اۋداندا وندىرىلگەن ءونىمدى قايتا وڭدەۋ ۇلەسىن كوتەرۋ. وسىعان بايلانىستى اۋدان اكىمىنە اۋىل شارۋاشىلىعى باسقارماسىمەن بىرلەسىپ ءتيىمدى شارالاردى قولعا الاۋى ءتيىس، - دەدى ب. يسابايەۆ.
ءوڭىر باسشىسى سونداي-اق شارۋاشىلىقتاردى سۋارمالى سۋمەن قامتاماسىز ەتۋ ماسەلەسىنە دە توقتالدى. كەلەسى جىلى «بايبىشە» كانالىن كۇردەلى جوندەۋ مەن بالىقتى وزەنىندە سۋ قويماسىن سالۋعا رەسپۋبليكالىق بيۋدجەتتەن قارجىلاندىرۋعا ءوتىنىم بەرۋ جوسپارلانۋدا. بيىل 4900 گەكتار القاپقا سۋ ۇنەمدەۋ تەحنولوگيالارىن ەنگىزۋ جوسپارلانعان. الايدا بۇل ءادىس تەك 1700 گەكتار جەردە قولدانىلىپ وتىر، سوندىقتان بۇل جۇمىستاردى جالعاستىرۋ كەرەك.
حالىقتىڭ نەگىزگى ازىعى سانالاتىن ەت پەن ءسۇتتىڭ ساپاسىنا جاۋاپتى ۆەتەريناريا سالاسى دا نازاردان تىس قالعان جوق. ۆەتەرينارلىق قىزمەتتىڭ ساپاسىن ارتتىرۋ ماقساتىندا وتكەن جىلى قاينارلى، جەتىسۋ، اقىن سارا اۋىلدارىندا بلوكتى-مودۋلدى ۆەتەريناريالىق پۋنكتتەر ورناتىلسا، بيىل قاراشا ايىندا قاراتال، كوكجازىق اۋىلدارىندا وسىنداي نىساندار پايدالانۋعا بەرىلەدى. سونىمەن قاتار سالانىڭ ماتەريالدىق-تەحنيكالىق بازاسىن نىعايتۋ ءۇشىن قاجەتتى قۇرال-جابدىقتار، 2 قىزمەتتىك جانە 1 مال تاسىمالداۋعا ارنالعان ارنايى اۆتوكولىكتەر ساتىپ الىندى. جالپى، ۆەتەريناريالىق قىزمەتكە جان-جاقتى قولداۋ بۇدان ءارى دە جالعاسادى.
ەسەپتىك كەزدەسۋ بارىسىندا اۋدان حالقىنىڭ ءومىر ءسۇرۋ ساپاسىن ارتتىرۋعا باعىتتالعان شارالارعا جانە الەۋمەتتىك-ەكونوميكالىق دامۋدىڭ نەگىزگى باعىتتارىنا باسا نازار اۋدارىلدى.
وبلىس اكىمى وتكەن جىلى حالىقپەن كەزدەسۋدە تۇرعىندار كوتەرگەن وزەكتى ماسەلەلەرگە دە توقتالدى. اتاپ ايتقاندا، كوكجازىق اۋىلىنىڭ تۇرعىنى گۇلنۇر بايمۇحان كوتەرگەن اۋىلعا باراتىن جولدى جوندەۋ جانە گاز جەلىسىن تارتۋ ماسەلەلەرى وڭ شەشىمىن تاپقان.
بۇگىندە جالپى ۇزىندىعى 8،7 شاقىرىم بولاتىن گاز قۇبىرىنىڭ قۇرىلىسى اياقتالدى، ەلدى مەكەن ىشىندەگى ورتا جانە تومەن قىسىمدى گاز جەلىلەرىنىڭ قۇرىلىسى جالعاسىپ جاتىر. قازىرگى تاڭدا 26 شاقىرىمنىڭ 8 شاقىرىمى سالىندى. ءسويتىپ گازداندىرۋ جۇمىستارىن جىل سوڭىنا دەيىن تولىق اياقتاۋ جوسپارلانىپ وتىر، ال جول جوندەۋ جۇمىستارى قازان ايىندا اياقتالادى.
ال جەرگىلىكتى تۇرعىن ۆالەنتينا بەليموۆا كوتەرگەن ماسەلە - قاراتال اۋىلىنا باراتىن جولدى جوندەۋگە كەلسەك، قازىرگى تاڭدا قاجەتتى قۇجاتتامالاردى دايىنداۋ جۇمىستارى جۇرگىزىلۋدە، جول قۇرىلىسىنا قاجەتتى قاراجات كەلەسى جىلى بولىنەدى دەپ جوسپارلانىپ وتىر.
سول سياقتى بۇعان دەيىن تۇرعىندار قوزعاعان ماسەلەلەرگە بايلانىستى باقتىباي اۋىلىنداعى گاگارين كوشەسى تولىق اسفالتتالدى، وتەناي اۋىلىندا مەديسينا نىسانى سالىنىپ، ەلتاي اۋىلىندا قۇرىلىسى باستالدى، شىمىر اۋىلىندا كوشە جوندەلىپ، جارىقتاندىرىلدى، دارىگەرلىك امبۋلاتوريا مەن سپورت كەشەنى سالىندى.
ءسوزىنىڭ سوڭىندا وبلىس باسشىسى بەيبىت يسابايەۆ اۋدان اكىمىنە اۋداننىڭ الەۋمەتتىك-ەكونوميكالىق دامۋىنداعى ورىن العان كەمشىلىكتەردى جويۋدى مىندەتتەدى، بۇل رەتتە وزەكتى پروبلەمالاردى شەشۋگە وڭىردە بارلىق مۇمكىندىك بار، وبلىس باسشىلىعى تاراپىنان قاجەتتى قولداۋ كورسەتىلىپ وتىر.
- ءبىزدىڭ تاراپىمىزدان الداعى ۋاقىتتا دا حالىقتىڭ ءومىر ءسۇرۋ ساپاسىن ارتتىرۋعا، اۋىلدىڭ الەۋمەتتىك-ەكونوميكالىق دامۋىنا ارنالعان ناقتى جۇيەلى شارالار جۇزەگە اسىرىلاتىن بولادى. ورىنباسارلارىما، اۋدان اكىمىنە، ءتيىستى باسقارمالارعا بولىنگەن بيۋدجەت قاراجاتىن ۋاقىتىلى، ساپالى يگەرۋدى تاپسىرامىن، - دەدى ب. يسابايەۆ.
