بۇگىن تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆ قىتايدىڭ گۋاندۋن پروۆينسياسىنىڭ نارىقتى رەتتەۋ اكىمشىلىگى جانە گۋاندۋن-گونكونگ-ماكاو ۇلكەن شىعاناعى ايماعىنىڭ سەرتيفيكاتتاۋ ورتالىعىنىڭ وكىلدەرىمەن ىسكەرلىك كەزدەسۋ وتكىزدى،- دەپ حابارلايدى Dalanews.kz
باسقوسۋدا تاراپتار اۋىل شارۋاشىلىعى، ونەركاسىپ، قۇرىلىس جانە قىزمەت كورسەتۋ سالالارىنداعى ىنتىماقتاستىق مۇمكىندىكتەرىن قاراستىردى. سونىمەن قاتار گۋاندۋن-گونكونگ-ماكاو ۇلكەن شىعاناعى ايماعىنىڭ سەرتيفيكاتتاۋ جوباسى كەڭىنەن تانىستىرىلىپ، ارنايى پلاتفورما قۇرۋ، وندىرىستىك ىنتىماقتاستىقتى دامىتۋ ماسەلەلەرى ءسوز بولدى.
وبلىس اكىمىنىڭ ءبىرىنشى ورىنباسارى ءوڭىردىڭ ينۆسەتيسيالىق جانە تۋريستىك الەۋەتىن تانىستىرىپ، بىرلەسە جۇمىس ىستەۋگە اشىق ەكەنىن جەتكىزدى.
– تۇركىستان وبلىسىندا ونەركاسىپتىڭ بەلسەندى دامۋىنا ىقپال ەتەتىن قولايلى ينۆەستيسيالىق احۋال قالىپتاسقان. ينۆەستورلار ءۇشىن 4 مىڭ گەكتار اۋماقتا ورنالاسقان «TURAN» ارنايى ەكونوميكالىق ايماعى جانە 20 يندۋستريالىق ايماعى بار. «TURAN» اەا قاتىسۋشىلارىنا جەڭىلدىكتەر قاراستىلادى. اكىمدىك تاراپىنان «ءبىر تەرەزە» قاعيداسى اياسىندا تولىق سۇيەمەلدەۋ جۇمىستارىن جۇرگىزەمىز. ءىرى جوبالارعا ينجەنەرلىك ينفراقۇرىلىم تارتۋعا، جەر تەلىمىن تاڭداۋعا، جوبانى ىلگەرىلەتۋگە تىكەلەي كومەك كورسەتەمىز. ءبىز تۇركىستان وبلىسى مەن جۇڭگو ەلىنىڭ ينۆەستورلارى اراسىنداعى ىنتىماقتاستىقتى تەرەڭدەتۋگە، سونداي-اق جاڭا بىرلەسكەن جوبالاردى ىسكە اسىرۋعا دايىنبىز، – دەدى زۇلپىحار جولداسوۆ.
گۋاندۋن-گونكونگ-ماكاو ۇلكەن شىعاناعى ايماعىنىڭ سەرتيفيكاتتاۋ جوباسى قحر مەملەكەتتىك نارىقتى قاداعالاۋ باسقارماسى مەن گۋاندۋن-گونكونگ-ماكاو ايماعىنىڭ ءتيىستى مەكەمەلەرىنىڭ جەتەكشىلىگىمەن جۇزەگە اسىرىلادى. بۇل قادام جەرگىلىكتى ونىمدەرگە گۋاندۋن-گونكونگ-ماكاو نارىعىنا شىعۋعا، برەند بەدەلىن ارتتىرۋعا جانە تۇتىنۋشىلاردىڭ كەڭ اۋقىمىن قامتۋعا مۇمكىندىك بەرەدى. جوباعا ءۇش ايماقتىڭ سەرتيفيكاتتاۋ ۇيىمدارى مەن نارىق سۋبەكتىلەرى قاتىسادى. ول اۋىل شارۋاشىلىعى ونىمدەرى، ونەركاسىپتىك تۇتىنۋ تاۋارلارى، جاسىل قۇرىلىس ماتەريالدارى جانە قىزمەت كورسەتۋ سالالارىن قامتيدى. نەگىزگى ماقسات – ءونىم مەن قىزمەت ساپاسىن ارتتىرۋ، وڭىرلىك نارىقتاعى ءوزارا تانۋ مەن ىقپالداسۋدى دامىتۋ.
قىتايلىق تاراپ تۇركىستان ءوڭىرىنىڭ ينۆەستيسيالىق مۇمكىندىكتەرىن جوعارى باعالاپ، بىرلەسكەن جوبالاردى جۇزەگە اسىرۋعا قىزىعۋشىلىق تانىتىپ وتىر. قىتايدا تابيعي ونىمدەرگە سۇرانىستىڭ جوعارى ەكەنىن اتاپ ءوتىپ، تۇركىستان ونىمدەرىن قىتايلىق جانە كورشىلەس نارىقتارعا شىعارۋعا ىقپال ەتۋگە دايىن ەكەنىن جەتكىزدى. قىتايدىڭ پروۆينسيالارىندا بيزنەس فورۋمدار ۇيىمداستىرۋعا، ارىپتەستەرىنە ءوڭىردىڭ مۇمكىندىكتەرى تۋرالى اقپارات بەرۋگە نيەتىن ءبىلدىردى.
ساپار بارىسىندا شەتەلدىك بيزنەس وكىلدەرى تۇركىستان وبلىسىندا وندىرىلەتىن ونىمدەرمەن تانىستى. وندىرىستىك پاركتەردى ارالاپ، جۇمىس بارىسىن باقىلادى.
