ەلوردادا اعىمداعى جىلدىڭ باسىنان بەرى تەرگەۋ يزولياتورىنا تىيىم سالىنعان زاتتاردى الىپ كىرۋگە تالپىنعان 9 جاعدايدىڭ جولى كەسىلدى. ونىڭ ىشىندە 6 ۇيالى تەلەفون مەن 3 ەسىرتكى زاتى تاركىلەنگەن،- دەپ حابارلايدى Dalanews.kz
سولاردىڭ ءبىرى – قوعامدىق قورعاۋشى مارتەبەسىنە يە ەر ادامنىڭ ارەكەتى. ول قاماۋدا وتىرعان جۇبايىنا ۇيالى تەلەفون بەرمەك بولعان. الايدا مەكەمە قىزمەتكەرلەرى قۇقىق بۇزۋشىلىقتىڭ الدىن الىپ، زاڭسىز ارەكەتتى دەر كەزىندە توقتاتتى. ناتيجەسىندە ول اكىمشىلىك جاۋاپكەرشىلىككە تارتىلىپ، قورعاۋشى مارتەبەسىنەن ايىرىلدى.
پروكۋراتۋرانىڭ مالىمەتىنشە، مۇنداي ارەكەتتەر ءۇشىن زاڭدا قاتاڭ جاۋاپتىلىق قاراستىرىلعان. اكىمشىلىك قۇقىق بۇزۋشىلىق تۋرالى كودەكستىڭ 481-بابىنا سايكەس، قۇقىق بۇزۋشىلارعا 10 ايلىق ەسەپتىك كورسەتكىشكە دەيىن ايىپپۇل سالىنادى. قايتالانعان جاعدايدا – 30 تاۋلىككە دەيىن اكىمشىلىك قاماۋعا الىنادى.
ال ەگەر تىيىم سالىنعان زات ەسىرتكى بولسا، قىلمىستىق كودەكستىڭ 297-بابى قولدانىلادى. ول ءۇشىن 20 جىلعا دەيىن باس بوستاندىعىنان ايىرۋ جازاسى كوزدەلگەن.
استانا قالاسىنىڭ پروكۋراتۋراسى ازاماتتاردى زاڭدى قاتاڭ ساقتاۋعا شاقىرىپ، تەرگەۋ يزولياتورىنا تىيىم سالىنعان زاتتاردى الىپ كىرۋدىڭ جول بەرىلمەيتىنىن ەسكەرتتى.
